Elorda ákimdigi eki deńgeıli jolaıryq salý jobasyna qatysty túsinik berdi

Qalalyq Kólik jáne jol-kólik ınfraqurylymyn damytý basqarmasy basshysy orynbasarynyń mindetin atqarýshy Madııar Tuqpatovtyń aıtýynsha, «N. Tilendıev dańǵyly men Sh. Beısekova kóshesiniń qıylysynda eki deńgeıli jolaıryq salý» jobasy aıasynda qurylys jumystary qarqyndy júrip jatyr.

- Kópirdiń metall konstrýktsııasy tolyqtaı montajdaldy. «Astyqjan» saýda úıi jaǵynan asfalt tóseý jumystary aıaqtaldy. Seıfýllın kóshesi jaǵynda qazirgi ýaqytta jol tósemin tóseý jáne asfalt tóseýge negiz daıyndaý jumystary júrgizilip jatyr. Injenerlik kommýnıkatsııalardy tartý boıynsha negizgi jumystar tolyq aıaqtaldy. Atap aıtqanda, sýmen jabdyqtaý, turmystyq jáne nóser kárizi, jylý jelileri jáne baılanys jelileri salyndy, - dedi M. Tuqpatov.

Onyń sózine qaraǵanda, osy jyldyń qazan aıynyń sońyna deıin negizgi jolǵa asfalt tóseý jumystaryn aıaqtap, Beısekova kóshesi arqyly Tilendıev dańǵylynyń ústimen avtokólik qozǵalysyn qamtamasyz etý josparlanǵan.

- Sonymen qatar, Tilendıev dańǵyly boıynsha asfalt tóseý jumystaryn osy aptynyń sońyna deıin aıaqtap, avtokólik qozǵalysyn tolyq ashý josparlanyp otyr, - dedi basqarma ókili.

Buǵan deıin Astanada Tilendıev dańǵylynyń bir bóligi 10 kúnge jabylǵanyn jazǵan edik.