Elorda ákimi LRT-nyń qashan iske qosylatynyn aıtty

ASTANA. KAZINFORM - Astana qalasynyń ákimi Jeńis Qasymbek Instagram paraqshasynda LRT-nyń qashan iske qosylatyny týraly jazdy, dep habarlaıdy elorda ákimdigini resmı saıty.

- Premer-mınıstrdiń orynbasary Roman Sklıarmen birge LRT deposynyń ǵımaratyna baryp, jeńil relsti kólik jobasyn iske asyrý aıasynda qurylyp jatqan Biryńǵaı dıspetcherlik ortalyqtyń jumys daıyndyǵymen tanystyq.

Ortalyq kólik júıesin basqarý men qaladaǵy jol-kóshe jelisindegi protsesterdi úılestirýdiń negizgi elementine aınalady.

Onyń fýnktsıonalyna LRT quramdarynyń qozǵalysyn basqarý, ıntellektýaldy kólik júıesiniń baǵdarsham nysandaryn úılestirý, qoǵamdyq kólikti dıspetcherlik súıemeldeý, velosıpedti jalǵa berý júıesin dıspetcherleý, sondaı-aq kólik derekterin óńdeý jáne saraptamalyq taldaý kiredi,-dep jazdy Jeńis Qasymbek.

Sol sııaqty aralaý barysynda «Áýejaı», «Báıterek», «Mınıstrlikter úıi», «Mýzeı» stantsııalarynyń jaı-kúıin qaraldy. Synaqtyq paıdalaný bekitilgen synaq baǵdarlamasyna sáıkes búkil jeli boıynsha júrip jatyr. Synaqtar ınfraqurylym men qaýipsizdik júıelerin tekserýdi, sondaı-aq personaldy daıarlaýdy jáne apattyq rásimderdi pysyqtaýdy qamtıdy. Quramdar Ortalyq Azııanyń klımatyna beıimdelgen, tómen temperatýra men aıazǵa tózimdi.

- LRT quramdary pılotsyz rejımde qatynaıdy. Synaq rejıminde paıdalanýdy aıaqtaý jáne jolaýshylar qozǵalysyn bastaý kúni barlyq is-shara kesheni tolyq oryndalyp, júıeniń belgilengen tehnıkalyq talaptarǵa sáıkestigi rastalǵannan keıin anyqtalatyn bolady. LRT jumysy jaqyn arada bastalady (kóktemde), - dedi elorda ákimi.

Osyǵan deıin elordadaǵy LRT qandaı qosymsha baǵyttarda damıtyny týraly jazdyq.