Elorda ákiminiń orynbasary kóshede adamdar sanynyń nelikten artyp jatqandyǵyn túsindirdi
NUR-SULTAN. QazAqparat – Nur-Sultan qalasy ákiminiń orynbasary Baqtııar Máken karantın kezinde qala kóshelerine shyqqan turǵyndardyń kóbeıýine qatysty pikir bildirdi, dep habarlaıdy QazAqparat tilshisi.
«Ózderińiz bilesizder, qalada kóptegen saıabaqtar men adamdar kóptep jınalatyn oryndar jabyq tur. Búginde biz karantın úshin arnaıy shekaralardy qoıdyq, ol jerlerge barýǵa bolmaıdy. Sondyqtan Polıtsııa departamenti men eriktiler arnaıy reıdter júrgizýde. Turǵyn úı aýlasynda arnaıy patrýl qyzmet atqarýda. Sebebi, kúnniń jylynýyna baılanysty turǵyndar kóshege shyǵýǵa tyrysýda. Alaıda turǵydar bul talaptarǵa túsinistikpen qaraýy kerek. Óıtkeni, karantın rejımi saqtalýda», - dedi B. Máken Ortalyq kommýnatsııalar qyzmetinde.
Onyń sózine qaraǵanda, keıbir kásipkerlik nysandarynyń jumysy jandanǵannan keıin, kóshedegi adamdar sany birshama artty.
«Reıdter qalanyń barsha aýdanynda júrgizilip jatyr. Adamdar sany kóp kóshelerde arnaıy profılaktıkalyq jumystar atqarylady. Eger turǵyndar jumysynan bólek, dúken nemese dárihanaǵa bara jatsa, bul jaǵdaıǵa túsinistikpen qaraımyz. Alaıda tıisti tártipti saqtaý maqsatynda turǵyndardy negizsiz kóshege shyqpaýǵa shaqyramyz», - dedi ákim orynbasary.
