Elorda ákimi jastarǵa keńes berdi
ASTANA. QazAqparat - Búgin qala halqynyń aldynda esep bergen Astana ákimi Baqyt Sultanov jumyssyz jastarǵa keńes berdi, dep habarlaıdy QazAqparat tilshisi.
«Eki qolǵa bir kúrek tabylady» degen sóz bar, aǵaıyn. Jumys isteımin degen adamǵa jumys kóp. Muny jaqynda ǵana Elbasymyzdyń ózi de jastarǵa aıtty. Demek, jastyq ómirdiń qaıratty shaqtaryn bos ótkizýden saq bolý kerek. Memlekettik jumyspen qamtý baǵdarlamasy bar, qaıta daıarlaý kýrstary ashyldy. Munyń barlyǵy Astana qalasy Jumyspen qamtý ortalyǵy arqyly júzege asyrylýda. Barshańyzdy osy múmkindikterdi paıdalanýǵa shaqyramyn», - dedi B.Sultanov.
Onyń aıtýynsha, elordada elektrondyq eńbek bırjasy iske qosylǵan. Jumysqa ornalasý protsedýrasy barynsha ashyq. Jumysqa ornalasýǵa járdemdesýmen 30 myń adam aınalysady. Qoǵamdyq jumysshylarǵa jalaqy eki ese kóterildi. Naqty aıtqanda, 2018 jylǵy 48 myń teńgeden 84 myń teńgege deıin artty.
«Biraq bul óz betinshe tıimdi mansabyn qura almaıtyndarǵa arnalǵan. Memleket basshysy jastarǵa da, eresekterge de jumys istegisi keletin adamǵa barlyq ýaqytta jumystyń tabylatyndyǵyn sharshamastan qaıtalap keledi. Barlyq jumysshylardy tutyný mádenıetiniń zamanaýı trendine ilespeı, aqylmen jáne shydamdylyqpen óziniń kásibı ári qoǵamdyq mansabyn qalyptastyrýdy ótinemin», - dedi Baqyt Sultanov.
