Elorda ákimi jańa skeıtbaq salý máselesin qaraýǵa ýáde etti
ASTANA. 25 qarasha. QazAqparat - Elorda ákimi Imanǵalı Tasmaǵambetov kóshe sporty skeıtbordıngpen áýestenýshilerge qoldaý bildirýge nıetti ekendigin jetkizdi.
Ol qala bıligi Astanada skeıtbaq salý týraly máseleni qarastyratyndyǵyn málimdedi.
«Qalada jabyq jańa skeıtbaq salý kelesi jylǵa josparlanbaǵan. Degenmen olardy keńeıtý máselesi taıaý bolashaqta qarastyrylatyn bolady», - dep jazdy ol óz blogynda.
Osy sport túrimen aınalysýǵa jáne sheberligin shyńdaýǵa arnalǵan arnaıy alań «Qazaqstan» sport saraıynyń mańyna jasalǵan. Sonymen qatar túrli mereke kúnderi elorda jurtshylyǵy men qonaqtar kóp jınalatyn oryndarda jáne «Dýman», «Han shatyr» ortalyqtary aýmaǵynda arnaıy alańdar da qurylady.
