Elorda ákimi jańa medıtsınalyq klasterdiń ashylýyna qatysty
ASTANA. QazAqparat - Búgin Astana ákimi Ádilbek Jaqsybekov bir aýysymda 500 adamdy qabyldaıtyn jańa ambýlatorııalyq-emhana kesheniniń ashylý saltanatyna qatysty. №9 qalalyq emhana QR Densaýlyq saqtaýdy damytýdyń «Salamatty Qazaqstan» memlekettik baǵdarlamasyn ike asyrý aıasynda salynǵan. Bul týraly Astana qalasy ákiminiń baspasóz qyzmetinen habarlady.
Keshen quramyna konsýltatıvtik-dıagnostıkalyq bólim, jalpy tájirıbe, profılaktıka jáne áleýmettik-psıhologııalyq kómek kórsetý dárigerleri bólimi, 20 oryndyq kúndizgi statsıonar jáne ambýlatorııalyq hırýrgııa ortalyǵy kiredi. Emhana Astananyń sol jaǵalaýyndaǵy 80 myńnan astam turǵynǵa qyzmet kórsetpek. Keshen halyqaralyq standarttardyń talaptaryna saı keletin zamanaýı medıtsınalyq qondyrǵylarmen jabdyqtalǵan. Sáýleli dıagnostıka salasynda zertteý júrgizýge arnalǵan apparatýra, dıagnostıkanyń ýltradybystyq ádisteri, balalar men eresekterde ishki organdar patologııasy dıagnostıkasyn jasaýǵa arnalǵan beıneendoskopııalyq apparatýra da bar. Sonymen qatar, LOR dáriger, oftalmolog jáne basqa dárigerler kabınetteri ashyldy. Emhana Orynbor kóshesi, 16/1 mekenjaıy boıynsha ornalasqan.
Sondaı-aq, qala basshysy ákimdiktiń «Onkologııalyq ortalyq» ShJQ MQK bazasyndaǵy jańa medıtsınalyq klasterdiń tanystyrylymyna qatysty. Mekemede VARIAN (AQSh) shyǵarǵan TRUEBEAM joǵaryenergetıkalyq jelilik jyldamdatqysh qoldanysqa engiziledi. Jelilik jyldamdatqysh qaterli isiktiń barlyq formalaryna zamanaýı tehnıkalardy paıdalana otyryp, sáýleli terapııa júrgizýge múmkindik beredi.
