Elorda ákimi: Sport nysandary qala turǵyndary úshin qoljetimdi bolady
NUR-SULTAN. QazAqparat - Elorda ákimi Altaı Kólginov balalar men jasóspirimderge arnalǵan sport mektepteriniń, federatsııalardyń, qalalyq sport mekemeleriniń ókilderimen kezdesýde buqaralyq sportty damytý máselesin talqylady, dep habarlaıdy QazAqparat qala ákimdigine silteme jasap.
«Elordada sport klasteri jaqsy damyǵan. Jyl saıyn halyqaralyq standarttarǵa saı jańa sport ǵımarattaryn ashyp jatyrmyz. Qalada 1,2 mln adam turady, olardyń úshten biri – jastar. Memleket basshysynyń tapsyrmasyna sáıkes buqaralyq sportty damytý mańyzdy.
Basty mindetimiz — sport nysandarynyń bárin qala turǵyndaryna qoljetimdi etý», - dedi Altaı Kólginov.
Qala ákimi sportqa qatysty bes máseleni atap ótti.
«Birinshi. Elorda jastary baǵdarlamasyn qabyldadyq. Bul baǵdarlama turǵyn úı, bilim alý, jumysqa ornalasý jáne bos ýaqytty tıimdi ótkizý sııaqty máselelerdi sheshýge septigin tıgizedi. Oǵan taǵy da bir baǵyt qosylady. Ol – buqaralyq sportty damytý baǵyty.
Mysaly, ótken jyly jeńil atletıkalyq sport keshenin ashtyq, qazir onda jeńil atletıkanyń 7 túri boıynsha kásibı sportshylar ǵana aınalysady.
Elorda turǵyndaryn kóbirek qamtý maqsatynda qyrkúıek aıynan bastap oǵan tilek bildirýshilerdiń bári barady. ıAǵnı jeńil atletıkamen tilek bildirýshilerdiń bári aınalyspaq. Jeńil atletıka keshenine kúnine 750 adam, al aıyna 20 myńnan astam adam bara alady», - dedi ol.
Ákimniń aıtýynsha, ekinshi mindet—balalar men jasóspirimder sportyn qoldaý.
«Qazir qalada 8 myńnan astam balany qamtıtyn 11 balalar men jasóspirimder sport mektebi jumys isteıdi. Qosymsha qarjylandyrý baǵyty esebinen balalar sanyn 50%-ǵa arttyrýdy josparlap otyrmyz. Sondaı-aq qosymsha jattyqtyrýshylardy jumysqa alamyz. Jastar buqaralyq sporttyń qaı túri boıynsha jáne qaıda shuǵyldana alatyny týraly stendter bolady», - dedi Altaı Kólginov.
Onyń aıtýynsha, balalar men jasóspirimder mektepteriniń quramynda erekshe qajettiligi bar balalardyń sportpen aınalysýyna baǵyttalǵan jeke baǵyt bar. Inklıýzııa jelisi boıynsha 17 sport páni bar.
«Úshinshi. Júıeli deńgeıde aýla klýbtarynyń sanyn kóbeıtýdi jalǵastyramyz. Qazir olardyń sany 30-dan kóp, birinshi kezeńde sanyn 50-ge deıin kóbeıtemiz. Bul eki ese kóp balany qamtýǵa múmkindik beredi», - dedi ákim.
Ákimniń aıtýynsha, qalanyń tórt eldi mekeninde (Kóktal, Óndiris, Úrker (Ilınka) jáne Temirjolshylar) jalpyǵa qoljetimdi dene shynyqtyrý-saýyqtyrý keshenderin, sondaı-aq Azııa elderinde tanymal ústel tennısi ortalyǵyn salynyp jatyr. Bul – tórtinshi másele.
«Kóktalda dene shynyqtyrý-saýyqtyrý kesheniniń qurylysy aıaqtaldy. Bul sport keshenderinde qala turǵyndary ártúrli sport túrlerimen tegin aınalysyp, densaýlyǵyn nyǵaıta alady», - dedi ol.
Besinshi - «Nur-Sultan – jaıly qala» master-jospary aıasynda sońǵy eki jylda abattandyrylǵan aýlalar men qoǵamdyq keńistikter sany (saıabaqtar, gúlzarlar, jelekjoldar) 400-ge jetken.
«Bul qoǵamdyq oryndar sport ınfraqurylymdy qamtıdy: fýtbol, voleıbol, basketbol, strıt-vorkaýt, velojol jáne t.b.
Osylaısha, Prezıdenttiń tapsyrmasy boıynsha sport ınfraqurylymyn kásibı klýbtarǵa emes, buqaralyq sport túrlerine barynsha qoldaý kórsetýge basa nazar aýdara otyryp damytamyz.
Buqaralyq sportqa baýlý qala turǵyndarynyń densaýlyǵyna oń áser etedi», – dedi elorda ákimi.
