Elorda ákimi soǵys ardagerlerin quttyqtady

NUR-SULTAN. QazAqparat - Elorda ákimi Altaı Kólginov Memleket basshysynyń atynan Uly Otan soǵysynyń ardagerlerin quttyqtady. Batyrlar soǵys jyldaryndaǵy, soǵystan keıingi ómiri týraly óz estelikterimen bólisti, dep habarlaıdy QazAqparat qalalyq ákimdiktiń resmı saıtyna silteme jasap.

95 jastaǵy Barlybaı Tabeshuly Kýrsk shaıqasynda artıllerıst-nysanashy bolǵan. Soǵystan keıingi jyldary muǵalim bolyp jumys istedi.

95-jastaǵy Mıhaıl Vasılevıch soǵys jyldarynda mınomet rotasynyń komandıri bolǵan. Ol Ýkraına, Rýmynııa, Moldavııa, Chehııa, Polsha, Vengrııa, Rýmynııadan ótti. Soǵystan keıingi jyldary JEO, temir jol, áýejaı, vokzal jáne t.b. qurylystaryna qatysty.

«Ardagerlerdiń arqasynda beıbit zamanda ómir súrip jatyrmyz. Batyrlarymyzdyń umytylmas erligine bas ıemiz. Ómir jolyńyz barlyǵymyzǵa úlgi-ónege. Jýyrda ardagerlerdi Elbasy quttyqtady», - dedi qala ákimi Altaı Kólginov.

Úrmeli aspaptar orkestri soǵys jyldarynyń ánderin ardagerlerdiń aýlalarynda oryndady. Uly Otan soǵysyndaǵy Jeńistiń 75 jyldyǵyna oraı Nur-Sultanda 3 688 adam birjolǵy aqshalaı tólem aldy. Jalpy somasy 180 mln teńgeni qurady. 44 soǵys ardagerine 1 mln teńgeden syıaqy berildi.