Elorda ákimi Prezıdenttiń Joldaýy boıynsha ákimdik jumysynyń baǵyttaryn atap ótti
«Bıyl memlekettik apparat shtaty 10%-ǵa, kelesi jyly 15%-ǵa qysqarady. Qysqartý tsıfrlandyrý men memlekettik fýnktsııalardy ońtaılandyrýdy eskere otyryp júzege asyrylady. «Qoljetimdi polıtsııa» qaǵıdatyn júzege asyrý úshin ýchaskelik polıtsııa qyzmetkerleriniń sany 224-ke kóbeıedi, 40-tan astam ýchaskelik pýnktter ashamyz. Jergilikti bıýdjetti ońtaılandyrý 36 mıllıard teńgeden astam qarjyny qurady. Únemdelgen qarajat mańyzdy salalarǵa baǵyttaldy: ekonomıkanyń naqty sektoryn qoldaý jáne ınfraqurylymdy damytý – 26 mıllıard teńge, áleýmettik salaǵa – 10 mıllıard teńgeden astam. Jyl sońyna deıin biz birqatar basqa kásiporyndardy ońtaılandyrýdy jáne nysandardy senimgerlik basqarýǵa berýdi júzege asyramyz»,- dep atap ótti Altaı Kólginov.
Sondaı-aq ol Memleket basshysynyń elimizdiń jańa ekonomıkalyq baǵytynyń 7 negizgi qaǵıdasyn eske saldy.
«Ónerkásipti jáne ShOB-ti qoldaý úshin memleket salyq jeńildikterin jasap, tólemderdi keıinge qaldyrdy jáne jeńildik sharttarymen nesıelerdi qaıta qarjylandyrýǵa múmkindik berdi. Tıisti memlekettik organdarmen birge ShOB-qa berilgen barlyq nesıeler boıynsha paıyzdyq mólsherlemeni 6%-ǵa deıin memlekettik sýbsıdııalaýdy qamtamasyz etý boıynsha jumys júrgizemiz. Biz Jumyspen qamtý Jol kartasy jobalaryn jergilikti qamtý úlesin 90%-ǵa deıin jetkizemiz. Aımaqtyq ınvestıtsııalyq keńesterdiń jumysyn qalpyna keltirý oń nátıje berdi: azamattar men qalaǵa qajet jobalardy qoldaımyz, ár ınvestormen jeke jumys isteıtin bolamyz jáne ákimshilik kedergilerdi azaıtý boıynsha jumysty jalǵastyramyz. AHQO áleýetin paıdalaný týraly tıisti memorandýmǵa qol qoıyldy», - dedi óńir basshysy.
Aıta ketsek, elordada turaqtandyrý qory qurylyp, bólshek saýda jelilerine jeńildikpen nesıe berý jumystary júrgizildi – birqatar iri saýda jelileri men bazarlar «aınalym mehanızmi» jobasyna qatysýda. Osy maqsattarǵa 3,6 mıllıard teńgeden astam qarajat bólingen. Osylaısha, naryq qatysýshylaryna qoldaý kórsetilip, áleýmettik mańyzy bar ónimder baǵasy turaqtandyrylýda.
«Búginde barlyq qarjylandyrý kózderi esebinen qalada 3,5 mıllıon sharshy metrden astam turǵyn úı qurylysy júrgizilýde. Biz halyqtyń áleýmettik osal toptary úshin qoljetimdi turǵyn úı segmentine basa nazar aýdarýdamyz.
Bıyl Memleket basshysynyń tapsyrmasy boıynsha qoljetimdi turǵyn úı qurylysynyń kólemi úsh ese artty. Biz sondaı-aq Qazaqstandyq ıpotekalyq kompanııa, «Turǵyn úı qurylys jınaq bankimen» birlesken jumys júrgizýdemiz»,- dep toqtaldy Kólginov.
Ákimniń sózine qaraǵanda, kúzgi JRVI maýsymy men koronavırýsqa qatysty ahýaldyń kúrdelenýi múmkin ekenin eskere otyryp, medıtsına mekemeleri dári-dármektermen, jabdyqtarmen jáne qorǵanys quraldarymen jabdyqtalǵan. Bul jumystar júıeli túrde júzege asyrylýda. Sonymen qatar birqatar medıtsına uıymdarynyń ınfraqurylymyn salý jáne qamtamasyz etý boıynsha jumys júrgizilýde.
Elordada bıyl byltyrǵydan eki ese kóp mektep -12 bilim berý mekemesi salynady. Qazirdiń ózinde olardyń altaýy ashylǵan. Bul jumys aldaǵy jyldarda da jalǵasyn tabady – 2021 jyly 20 myń oqýshyǵa arnalǵan taǵy 12 mektep salynyp, paıdalanýǵa berilmek. Bıyl «Jumyspen qamtýdyń jol kartasy» boıynsha 26 bilim berý nysany jóndeletin bolady.
Qashyqtan oqytýdy eskere otyryp, birinshi kezekte az qamtylǵan otbasylardyń balalary kompıýter jáne roýtermen qamtamasyz etiledi. «Muǵalim mártebesi týraly» zań qabyldandy, 2020 jyldyń 1 qańtarynan bastap muǵalimderdiń jalaqysy 25%-ǵa kóterildi. Balalardy kıberbýllıngten qorǵaý boıynsha jumystarǵa erekshe nazar aýdarylady.
Kásibı sportqa bólingen qarajat balalar men jasóspirimder sportyn jáne buqaralyq sportty damytýǵa baǵyttalady. Sport alańdary bar 150 aýlany kógaldandyrý jumystary aıaqtalýǵa jaqyn. 4 úlken dene shynyqtyrý-saýyqtyrý kesheni, erekshe qajettilikteri bar balalardy ońaltýǵa arnalǵan at sporty maneji salynyp jatyr. Sonymen qatar Tolqyn, Qazaqstan sport kesheni, Q. Muńaıtpasov atyndaǵy stadıon jáne basqa da birqatar sport nysandary kúrdeli jóndeýden ótkiziletin bolady.
Sonymen qatar ákim ekologııany jaqsartý baǵytynda birqatar aýqymdy jumystar júrgizilip jatqanyn jetkizdi. «Birinshi – Elbasynyń tarıhı jobasy – qalany gazdandyrý. Aldaǵy jylý berý maýsymynyń ózinde Jeleznodorojnyı, Promyshlennyı, Kóktal-1, Kóktal-2 turǵyn alaptary, Agroqalashyq, Ońtústik-Shyǵys turǵyn alaptarynyń bir bóliginiń turǵyndary úılerin gazben jylyta alady.
Osy jyldyń basynda jelige 100-ge jýyq elektr avtobýsy shyǵaryldy. Artyqshylyqtary – ekologııalyq taza jáne qorshaǵan ortany zııandy zattarmen lastamaıdy. Sonymen qatar, elektr avtobýstardyń sany jeke qarajat esebinen kóbeıtiledi. Bıyl 33 myńnan astam aǵash otyrǵyzyldy, bul 2019 jylmen salystyrǵanda 40%-ǵa artyq. Sonymen qatar Taldykól jáne Maıbalyq kólderine irgeles aýmaqtarda ekoparkter qurý óte mańyzdy. Bul aımaqtar bıoalýantúrlilikti saqtaı jáne arttyra otyryp, ekotýrızmdi damytý ortalyǵyna aınalýy múmkin, - dep atap ótti ol.
«Nur-Sultanda tsıfrlandyrý sheńberinde 160 memlekettik qyzmettiń búginde 133-i (83%) avtomattandyrylǵan. Jyl sońyna deıin memlekettik qyzmetter 100% elektrondy formatqa kóshiriledi. Sonymen qatar búkil qalany tsıfrlandyrý boıynsha ınjenerlik jeliler, geoaqparattyq portal qurý, turǵyn úı sektoryndaǵy qyzmetterdi avtomattandyrý jáne «Qaýipsiz aýla» jobasy da iske asyrylýda. Al azamattardy qabyldaý turaqty túrde ótkizilip turady. Ótken jyly 11 myńnan astam adam qabyldandy. Sondaı-aq tıimdi keri baılanys úshin «Januıa» otbasy ınstıtýtyn qoldaý ortalyǵy ashyldy», – dep sózin túıindedi elorda ákimi Altaı Kólginov.