Elorda ákimi kún saıyn baǵa monıtorıngin júrgizedi
ASTANA. QazAqparat - Búgin Astana qalasynyń ákimi Imanǵalı Tasmaǵambetov teńge baǵamynyń ózgerýine baılanysty baǵalardy turaqtandyrý máseleleri boıynsha jıyn ótkizdi.
Bul týraly astana.kz habarlady. Jıyn barysynda I.Tasmaǵambetov Astana qalasy ákiminiń orynbasary Ersaıyn Nagaspaevqa Aýyl sharýashylyǵy jáne Kásipkerlik pen ónerkásip basqarmalarymen birlesip negizgi azyq-túlikterdiń baǵalaryna kún saıyn monıtorıng júrgizýdi tapsyrdy.
«Baǵanyń ósýine jol bermeý jónindegi sharalardy qabyldap, baǵa kelisimin boldyrmaý kerek. Budan basqa, iri saýda ortalyqtarynda esepteýdi sheteldik valıýtamen baılanystyrýǵa jáne jalǵa alý aqysyn kóterýge jol bermeý qajet. Jergilikti taýar óndirýshilerdiń óz ónimderiniń baǵasyn jasandy túrde ósirýine jol bermeý boıynsha jeke jumystar júrgizip, qalanyń azyq-túliktik qoryn ýaqytyly toltyrýǵa baǵyttalǵan sharalar qabyldansyn»,- dedi qala basshysy.
Sonymen qatar, azyq-túliktik beldeý aıasynda aýyl sharýashylyǵy ónimderiniń jabdyqtaýshylarmen jumys jandandyrylady.
Elorda ákimi Jolaýshylar kóligi jáne avtomobıl joldary basqarmasyna apta sońyna deıin avtoparkter men taksoparkterdiń ókilderimen kórsetiletin qyzmetterdiń baǵalaryn qalyptasqan deńgeıde ustaý qajettiligi boıynsha jumystar júrgizýdi tapsyrdy.
Halyqtyń áleýmettik osal toptary da nazardan tys qalǵan joq. Ákim tıisti basqarmalarǵa osy topqa jatatyn adamdar úshin dári-dármekterdiń baǵasynyń ósýine jol bermeýdi, sondaı-aq, jumys oryndarynyń qysqartylýyn jáne eńbekaqy tóleý boıynsha eńbek zańnamasyn negizsiz buzý jaǵdaılaryna apta saıyn monıtorıng júrgizýdi tapsyrdy.
Alaqol kásipkerlerdiń únemdeý maqsatynda sapasyz ónimderdi paıdalaný faktilerin boldyrmaý úshin qoǵamdyq tamaqtaný jelisinde, sondaı-aq, aýrýhanalarda, mektepterde, balabaqshalar men JOO-larda paıdalanylatyn azyq-túlikterdiń sapasy baqylaýǵa alyndy.
Tasmaǵambetovtyń aıtýynsha, qalada tarıfterdi, ásirese janar-jaǵarmaı baǵasyn ustap turý boıynsha sharalar qabyldaý qajet.
«Muny nazardan tys qaldyrmaý kerek, ásirese, janar-jaǵarmaı baǵasyn ustaý boıynsha sharalar qabyldanýy tıis. Munymen qosa, turǵyn úı qoryna qyzmet kórsetýmen baılanysty qyzmetter - bul másele nazarǵa alyndy. Osyǵan baılanysty, Almaty, Esil jáne Saryarqa aýdandarynyń ákimderine Turǵyn úı ınspektsııasy basqarmasymen birlesip tarıf qalyptastyrý máselesin qatań baqylaýǵa alýdy, PIK tarapynan qyzmetterge tarıfterdi kóterý boıynsha is-áreketterdiń jolyn qııýdy tapsyramyn»,- dedi I. Tasmaǵambetov.
