Elorda ákimi qoǵamdyq kólikterdiń nelikten jappaı toqtatylǵanyn túsindirdi
NUR-SULTAN. QazAqparat – Nur-Sultan qalasynyń ákimi Altaı Kólginov elordada nelikten qoǵamdyq kólikterdiń toqtatylǵanyn túsindirip berdi, dep habarlaıdy QazAqparat tilshisi.
«Bul karantın kezeńindegi májbúrli ári qajetti shara. Sebebi qalamyzda turǵyndar kúnine 750 myń adam avtobýspen qatynaıdy. Toqtatpasaq, qanshama adamnyń basyn qaýipke tiger edik. Júrgizýshilerdiń biriniń koronavırýs juqtyrǵan adammen baılanysta bolǵanyn esepke ala otyryp, biz barlyq avtobýsty óńdep, jumysshylardyń bárin testten ótkizip jatyrmyz», - dedi qala ákimi Tengrınıýs.kz portalyna bergen tikeleı efırdegi suhatynda.
Osy sebepti qalalyq shtab shahardaǵy qoǵamdyq kólikterdiń bárin toqtatý týraly ortaq sheshimge kelgen. Alaıda bul máselege kelgende qala basshylyǵyna turǵyndardan birshama ótinim túsken eken.
«Adamdar «úıde qalyńyzdar deısizder, biraq jumys júrip jatyr» deıdi. Sol sebepti tek qalanyń tirshiligine tikeleı qatysty qyzmetterdi ǵana qaldyrýǵa týra keldi. Olardyń qatarynda – ákimdik qyzmetkerleri, medıtsına mamandary, quqyq qorǵaý organynyń qyzmetkerleri, áskerıler men sýmen, jylýmen qamtamasyz etetin qyzmetkerler bar. Ruqsat boıynsha júretin jeńil avtokólikter qaldy. Kesheden beri olardyń bárin de tekserýdemiz», - dedi ol.
