Elorda ákimi qalanyń týrıstik aımaqqa aınalýyna nıetti

Ol bul oıyn búgin Astanadaǵy «AstanaINVEST 2010» birinshi halyqaralyq ınvestıtsııalyq forým barysynda bildirdi.

«Astana eýrazııalyq qurlyqtyń ortasynda ornalasqan jáne ózine eýrazııalyq ári azııalyq dástúrlerdi jalǵap otyr. Búgingi tańda Astana 2011 jylǵy Azıadanyń astanasy bolyp tabylady. Osynyń barlyǵy Qazaqstan astanasynyń halyqaralyq týrıstik jáne sporttyq ortalyq bolýyn aıqyndaýda», degen qala basshysy Astanany saıahattaýǵa jany súıetin jandar úshin tartymdy týrıstik aımaqqa aınaldyrýǵa nıetti ekendigin jetkizdi. Degenmen ol úshin sheteldik týrıster tarapynan suranysqa ıe aımaqtyń biregeı oryndaryn jetildirý qajettigin, sol arqyly Astanannyń halyqaralyq mártebesi arta túsetindigin aıtty.

«Bul oraıda aldymyzda damý boıynsha úlken jumystar, atap aıtqanda, halyqaralyq standarttarǵa jaýap beretin jaqsy joldar salýdy, jaıly qonaqúıler, sporttyq jáne týrıstik bazalar jelisin turǵyzýdy júzege asyrý qajet», dedi I.Tasmaǵambetov.

Atalǵan jumystarǵa shaǵyn jáne orta bıznestiń belsendi aralasýy tıis ekendigin basa aıtqan qala ákiminiń paıymdaýynsha, naq osy kásipkerler memlekettik naǵyz aktıvterin qurady. «Sondyqtan biz shaǵyn jáne orta bıznes aıaǵynan nyq turyp, damýy úshin barlyq kúsh-jigerimizdi jumsaımyz», dedi ol.