Elorda ákimi «Esil» aýdany turǵyndarynyń shaǵymyna baılanysty birqatar tapsyrmalar berdi
ASTANA. QazAqparat - Astana ákimi Áset Isekeshev «Esil» aýdanyndaǵy birqatar ınfraqurylymdyq jáne áleýmettik nysandardy aralady, dep habarlaıdy elorda ákimdiginiń baspasóz qyzmeti.
Birinshi kezekte ol at basyn «Prıgorodnyı» turǵyn úı alabyna tiregen bolatyn. Turǵyn úı alabynyń turǵyndary ákimge mektep, emhana sııaqty áleýmettik nysandardyń, saıabaqtar men gúl baqtary sııaqty demalys oryndarynyń, turaqtardaǵy oryndar men baǵdarshamdardyń jetkiliksiz ekenin aıtty. Osy máselelerdiń tez arada sheshimin tabýy úshin Áset Isekeshev Tabıǵı resýrstar jáne tabıǵatty paıdalanýdy retteý, sáýlet jáne qala qurylysy jáne jolaýshylar kóligi basqarmalaryna, «Astana ÁKK» AQ-na burylý alańy keńeıtilgen gúl baǵy qurylysynyń egjeı-tegjeıli josparyn ázirleýdi júktedi.
Emhanaǵa qatysty másele jóninde aıtar bolsaq, 2017 jyldyń 1 qyrkúıegine deıin munda otbasylyq-dárigerlik ambýlatorııa óz esigin ashýy kerek edi. Osynyń nátıjesinde tar sheńberli mamandyq ıeleri jumyspen qamtylýy tıis bolatyn.
Budan bólek, bıyl №24 mekteptiń japsarlas ǵımaratynyń qurylysy júrgiziledi dep josparlanýda. Sondaı-aq, qala ákimi turǵyn úı alabyndaǵy úılerdiń aýlalaryn abattandyrý jumystaryn belsendendirýdi tapsyrdy.
Budan keıin Astana ákimi Úrker turǵyn úı alabynyń turǵyndarymen kezdesti. Munda joldar men ınjenerlik jelilerdiń qurylysyn aıaqtaýǵa qatysty suraqtar kóterildi. Osy rette Áset Isekeshev mektep janyndaǵy kóshelerdi jaryqtandyrý, jyly aıaldamalardy ornatý, jaıaý júrginshilerge arnalǵan joldardy jaılandyrý jumystaryn jedeldetip, 2, 3, 4 kezekter boıynsha sharalardy jyl sońyna deıin aıaqtaýdy tapsyrdy.
Sonymen qatar turǵyndar eldi mekende «Sergek» beınebaqylaý júıesi kameralarynyń ornatylýyn, jastarǵa arnalǵan aýla klýbtarynyń qurylýyn, medıtsına jáne bilim berý salasynda jumys isteıtin mamandar úshin jataqhananyń boı kóterýin surady. Áset Isekeshev jaýapty tulǵalarǵa osy máselelerdi sheshýdi júktedi. Sondaı-aq, ol qazirgi tańda turǵyn úı alabynda sporttyq saýyqtyrý keshenin turǵyzý jónindegi jospardyń ázirlenip jatqandyǵyn jetkizdi.
Ákim budan keıin Jaǵalaý shaǵyn aýdanynda bolyp qaıtty. Shaǵyn aýdannyń turǵyndary qala basshysyna ózderin medıtsınalyq ortalyqtyń jetkiliksizdigin, kólik turaqtaryndaǵy oryndardy jaılastyrýǵa qatysty suraqtardyń mazalaıtyndyǵyn aıtty. Kelesi aptada shaǵyn aýdanda medıtsınalyq kabınet ashylatyndyqtan, medıtsınalyq qyzmetterge qatysty másele óz sheshimin aldaǵy birneshe kúnde tabady.
Al medıtsınalyq ortalyq shaǵyn aýdanda osy jyldyń shilde aıynda boı kóteredi dep kútilýde. Atalmysh aýmaqta halyqtyń tyǵyz ornalasqandyǵyn eskergen Áset Isekeshev úılerdiń aýlalaryn turaqtarmen jaılastyrýdy tapsyrdy.
«Esil» aýdanynyń áleýmettik jáne ınfraqurylymdyq nysandaryn aralaý barysynda ákim júktegen tapsyrmalardyń barlyǵy elorda turǵyndary men qonaqtaryn jaılylyqpen, qaýipsizdikpen qamtý, sondaı-aq, Astananyń syrtqy kelbetin kóriktendirý maqsatynda berildi.
