Elorda ákimi eki qyzdy sýdan qutqarǵan polıtseı men TJD qyzmetkerin marapattady
NUR-SULTAN. QazAqparat – Búgin elorda ákimi Altaı Kólginov eki qyzdy sýdan qutqarǵan polıtseı men TJD qyzmetkerin marapattady, dep habarlaıdy QazAqparat tilshisi.
Atap aıtqanda, Nur-Sultan qalasy Tótenshe jaǵdaılar departamenti qutqarý otrıadynyń qyzmetkeri Dmıtrıı Inkın men Polıtsııa departamentiniń aǵa ınspektory Rýslan Saıdovke «Alǵys hat» pen estelik syılyq tapsyrdy.
«Kúndelikti azamattardyń qaýipsizdigin qamtamasyz etýde polıtseıler men qutqarýshylarymyz laıyqty úlesin qosyp júr. Olar ózderiniń qyzmetterin adal atqaryp júrgen azamattar. Jaqynda osy qyzmetkerlerimiz adam ómirin qutqaryp qaldy. Sondyqtan áriptesterdiń atynan óziniń qyzmetimen úlgi bolyp júrgen búgingi marapattalǵan azamattarǵa alǵysymyzdy aıtqym keledi», - dedi Altaı Kólginov.
Eske sala keteıik, 28 shilde kúni tústen keıin «Prıchal» qonaq úıiniń aýmaǵynda D. Inkın óziniń shuǵyl áreketimen sýǵa batyp jatqan qyzdy alyp shyqqan bolatyn. Keıin sol jerde taǵy bir qyz qutqaryldy. Qutqarý sharalary barysynda Dmıtrıge polıtsııa qyzmetkeri R. Saıdov kómektesken bolatyn.
