Elorda ákimi daryndy balalarmen kezdesti
NUR-SULTAN. QazAqparat - Nur-Sultan qalasynyń ákimi Altaı Kólginov daryndy balalarmen – halyqaralyq jáne respýblıkalyq olımpıadalardyń júldegerlerimen, jeńimpazdarymen kezdesti, dep habarlaıdy QazAqparat.
Bıylǵy oqý jylynda elordalyq oqýshylar jalpy bilim beretin pánder boıynsha halyqaralyq deńgeıde 400-den astam jáne respýblıkalyq deńgeıde 900-ge jýyq medal jeńip aldy.
«Elordada 190 myńnan astam oqýshy bilim alatyn 130 jalpy bilim berý mekemesi bar. Adamı kapıtaldy damytý jáne balalarymyzdyń odan ári damýy úshin jan-jaqty jaǵdaı jasaý mańyzdy. Sebebi qazirgi ýaqyt óte qyzyqty jáne básekege toly. Búgingi zaman óz eliniń taǵdyry úshin jaýapkershilikti moınyna ala biletin, básekege qabiletti, jigerli, talantty, belsendi jastardyń ýaqyty», - dep atap ótti elorda ákimi Altaı Kólginov.
Sonymen qatar, 14 jyl boıy elorda quramasy jalpykomandalyq esepte 1-oryndy ıelenip, «Úzdik komanda» atandy. Bul elordalyq bilim berý júıesiniń joǵary deńgeıin kórsetedi.
«Jyl boıy qashyqtan oqydyq. Ońaı bolǵan joq. Alaıda muǵalimderdiń eńbeginiń arqasynda bul qıyndyqty da ótkerdik. Ustazdarymyz da bizge senim artty. Ózim matematıka páninen olımpıadaǵa qatysyp, úshinshi oryn aldym. Bolashaqta matematıka pániniń muǵalimi bolǵym keledi», - dedi daryndy balalarǵa arnalǵan «Bilim-ınnovatsııa» mektep-lıtseıiniń 8-synyp oqýshysy Kerimhan Álbar.
Bıyl elordada 16 iri gabarıtti mektep salynady, osynyń nátıjesinde 40 myńnan astam jańa oqýshy orny qurylady. Bul ótken jylmen salystyrǵanda eki ese kóp.
Birqatar mektepte ınklıýzııany qoldaý kabınetteri ashyldy.
Mektepterdi salý men jóndeýden bólek, qosymsha bilim berýdi damytýǵa da erekshe kóńil bólinedi. Elordada tehnıkalyq shyǵarmashylyq ortalyǵy («Temirjolshylar» TM), M.Ótemisuly atyndaǵy Oqýshylar saraıy kópbeıindi qosymsha bilim berý ortalyǵy retinde jumys isteıdi. Osy qosymsha bilim berý ortalyqtarynda robototehnıkamen, avıamodeldeýmen, tehnıkalyq dızaınmen, qolónermen, motokrosspen jáne t.b. aınalysý úshin barlyq jaǵdaı jasalǵan. Bıyl qosymsha jańa Oqýshylar saraıy ǵımaratynyń qurylysy bastalady.
Aýla klýbtary da balalardy qosymsha bilimmen qamtýǵa kómektesedi. Búginde Nur-Sultanda 28 aýla klýby jumys isteıdi, al onda úsh myńǵa jýyq bala bilim alady.
Osy sharalardyń bári balalarǵa sporttyq, shyǵarmashylyq jáne zııatkerlik áleýetti iske asyrýǵa múmkindik beredi.
