Elorda ákimi azyq-túlik baǵasyn turaqtandyrý jóninde keńes ótkizdi

NUR-SULTAN. QazAqparat - Elorda ákimi Altaı Kólginov áleýmettik mańyzy bar azyq-túlik baǵasyn turaqtandyrý jóninde keńes ótkizdi. Kezdesýge iri saýda jelileri men bazar ókilderi qatysty, dep habarlaıdy QazAqparat qala ákiminiń baspasóz qyzmetine silteme jasap.

Memleket basshysy Qasym-Jomart Toqaev áleýmettik mańyzy bar azyq-túlik taýarlarynyń baǵasyn baqylaýda ustaýdy tapsyrdy.

«Baǵany turaqtandyrý boıynsha 2 baǵytta jumys júrgizip jatyrmyz: turaqtandyrý qory quryldy, saýda jelilerin jeńildikpen nesıelendirý boıynsha jumystar júrgizildi. «Aınalym shemasy» jobasyna «Magnum», «Astyqjan», «Kenmart», «Small», «Shapaǵat», «Evrazııa», «Artem», «Bıg Shanhaı» sııaqty saýda oryndary qatysady, sondaı-aq et pen jarma boıynsha jetkizýshiler anyqtaldy. Kóterme saýda, deldaldar, kásipkerler jáne basqalar tarapynan «azyq-túlik sebetine» jatatyn taýarlarmen alypsatarlyq bolmaýy tıis. Osy baǵyttaǵy jumystar jalǵasyp jatyr. Baǵany turaqtandyrý máselesi memleket basshylyǵynyń baqylaýynda», - dedi qala ákimi Altaı Kólginov.

Investıtsııa jáne kásipkerlikti damytý basqarmasynyń basshysy Erlan Bekmurzaev dúrligýge sebep joq ekenin,azyq - túlik jetkilikti mólsherde baryn atap ótti.

Sondaı-aq, elorda ákimdigi áleýmettik nan baǵasyn ustap turý máselesin qarastyrdy: turaqtandyrý qorynyń un qory tolyqtyrylyp, qalanyń naýbaıhanalaryna qoldaý kórsetilip jatyr. Aýylsharýashylyq jármeńkelerin ótkizý baǵany ustap turýǵa jáne ónimdi naryqtyq baǵadan tómen satýǵa múmkindik beredi.

Aýylsharýashylyq jármeńkeleriniń maýsymy «Aspan bazar» saýda úıinde bastaldy, jármeńke ár senbi men jeksenbi kúnderi sáýir aıyna deıin ótedi.