Elorda ákimi avtobýsty uzaq kútý máselesi qalaı sheshiletinin aıtty

ASTANA. QazAqparat – Bıyl elordanyń Táýelsizdik dańǵylyndaǵy kólik kópiri paıdalanýǵa beriledi. Shaharǵa 400 avtobýs jetkizilip, 70-ten astam kóshe jóndeledi. Bul týraly ortalyq kommýnıkatsııalar qyzmetinde ótken brıfıngide Astana ákimi Jeńis Qasymbek aıtty, dep habarlaıdy QazAqparat tilshisi.

«Qala halqynyń ósimin eskere otyryp, qoǵamdyq kólikter sanyn ulǵaıtý jumysyn júrgizip jatyrmyz. Jýyrda 20 elektroavtobýs jetkizildi, oǵan deıin 50 avtobýs bolatyn. Shilde aıynda taǵy 70 avtobýsty kútip otyrmyz. Jyl sońyna deıin barlyǵy 400 avtobýs ákelinedi. Bul jańa baǵyttardy iske qosýǵa, kútý ýaqytyn qysqartýǵa, eski avtobýstardy almastyrýǵa múmkindik beredi», - dedi elorda ákimi.

Spıkerdiń sózinshe, jyl sońyna deıin Esil ózeni arqyly ótetin Táýelsizdik dańǵylyndaǵy kópir ashylady.

«Bul kópir joldardaǵy kólik nópirin edáýir jeńildetýge múmkindik beredi. Ol Táýelsizdik dańǵylymen, jańa temirjol vokzaly aýdanymen, Qoshqarbaev dańǵylymen, Nájimedenov kóshesimen, Áziret Sultan meshiti aýdanymen, Baıtursynov, Qordaı, Aınakól kóshelerimen, Momyshuly dańǵylymen qosymsha baılanysty qamtamasyz etedi», - dep toqtaldy Jeńis Qasymbek.

Elorda ákimi qalada jol jóndeý jumystarynyń júrip jatqanyna da toqtaldy.

Onyń sózinshe, bıyl jalpy uzyndyǵy 54 shaqyrymnan asatyn 70-ten astam kóshe jóndeýden ótedi.