Elorda ákimi Astana qalasynyń aýmaǵynda ornalasqan túrmeni kóshirýdi usyndy
ASTANA. QazAqparat - Astana qalasynyń aýmaǵynda ornalasqan túrmeni kóshirý qajet. Búgin QR Bas prokýratýrasynda ótken Zańdylyqty qamtamasyz etý, quqyqtyq tártip jáne qylmyspen kúres jónindegi Úılestirý keńesiniń kezekti otyrysynda Astana qalasynyń ákimi Imanǵalı Tasmaǵambetov osyndaı usynys aıtty.
«Astana aýmaǵynda túzeý mekemesi ornalasqan. Bul meniń oıymsha, elorda úshin qaýipti nysan. Bul qaladan oqshaýlanǵan aýmaqta emes, kerisinshe, bazarǵa taqaý ornalasqan. Al bazar aýmaǵynyń ózi krımınogendik ahýaldy aımaq sanalady», - deıdi qala ákimi.
Bul rette I. Tasmaǵambetov 2005 jyly Ózbekstannyń Ándijan qalasyndaǵy túrme mekemesinde jappaı tártipsizdik oryn alǵanyn mysalǵa alyp, máseleniń tórkinin «jaman aıtpaı jaqsy joq» degenge keltirdi.
«Bul mekemeni qala aýmaǵynan kóshirý kerek. Úkimet aldyna da osyny qoıyp otyrmyz. Úılestirý keńesiniń de qoldaýy mańyzdy», - dedi I. Tasmaǵambetov.
