Elorda ákimi Astana qalasy ІІD-niń jeke quramymen kezdesti
Elorda basshysy qalalyq departamenttiń obektilerin aralap, jol-patrýldik polıtsııa polkiniń, arnaıy jedel áreket etý tobynyń jumysymen tanysty, sondaı-aq, quqyq qorǵaý organdarynyń qarý-jaraqtary men arnaıy tehnıkasyn kórdi.
Kezdesý Almatyda aýdandyq ІІB men UQK departamenti ǵımarattaryna jasalǵan shabýyl kezinde qurban bolǵandardy eske alýdyń qurmetine bir mınýt únsizdikten bastaldy.
Kezdesý barysynda Áset Isekeshev polıtsııanyń ózara is-áreketiniń tıimdiligin jáne arnaıy qyzmetterdiń lańkestik qaýip-qaterge daıyndyǵyn taldaý qajet ekendigin atap ótti.
Sonymen qatar, qylmyspen kúresti kúsheıtý, qoǵamda quqyq buzýshylyqtarǵa nóldik tózimdilikti qalyptastyrý jónindegi sharalar men aldyn alý sharalarynyń mańyzdylyǵy talqylandy.
«Memleket basshysy aıtqandaı, usaq quqyq buzýshylyqtardy da keshirýge bolmaıdy. Óıtkeni, bassyzdyq odan asqan qylmystarǵa ákelýi múmkin» - dedi ákim.
Astana ákimi turǵylyqty jeri boıynsha jumys istep, turǵyn úı-turmystyq saladaǵy daý-damaılardyń aldyn alyp, halyqpen turaqty kezdesip turatyn Jergilikti polıtsııa qyzmetiniń jáne ýchaskelik ınspektorlardyń róli men mańyzdylyǵyn erekshe atap ótti.
«Biz Astanany jaıly ári qaýipsiz qalaǵa aınaldyrý mindetin alǵa qoıyp otyrmyz. Elorda turǵyndary men qonaqtary múliktik quqyqtary men tynyshtyǵy qorǵalatynyna senimdi bolýy kerek. Qoǵamnyń qaýipsizdigin qamtamasyz etý máselelerinde Sizder mańyzdy ról atqarasyzdar», - dedi ákim.
Kezdesý sońynda Á. Isekeshev polıtseılerge kúndelikti qyzmetteri úshin alǵys aıtyp, ІІD jeke quramyna arnaıy mashınalardyń kiltin tabystady. Sonymen qatar, erekshe kózge túsken polıtseıler Astana ákiminiń atynan alǵys hattarmen marapattaldy.