Elorda ákimdiginde Memleket basshysynyń Joldaýynyń basty basymdyqtary talqylandy
ASTANA. QazAqparat - Búgin elorda ákimdiginde Qazaqstan Respýblıkasynyń Prezıdenti Nursultan Nazarbaevtyń «Qazaqstannyń úshinshi jańǵyrýy: Jahandyq básekege qabilettilik» Joldaýyn talqylaý boıynsha keńeıtilgen otyrys ótti.
Onyń jumysyna elorda ákimi Áset Isekeshev, Ulttyq ekonomıka vıtse-mınıstri Tımýr Jaqsylyqov, qalalyq máslıhattyń depýtattary, Astana qalasynyń aktıvi, qoǵamdyq jáne úkimettik emes uıymdardyń ókilderi, qala ákimshiligi basqarmalarynyń basshylary qatysty.
«Bul Joldaý ózgelerden erekshe, qala ákimdigi, máslıhat depýtattary, qoǵamdyq keńes joldaýdy júzege asyrý úshin tıisti sharalar qabyldaıtyn bolamyz. Memleket basshysy aldymyzǵa kúrdeli mindetter qoıyp otyr. Sońǵy jyldary álemdegi ekonomıkalyq ahýal qıyndaı túskenin bilesizder, biz álemdik saýdaǵa belsendi túrde aralasyp otyrǵandyqtan, onyń bizdiń ekonomıkaǵa da áseri bar. Biraq Memleket basshysynyń «Nurly jol» jańa ekonomıkalyq saıasatynyń, «100 naqty qadam» Ult josparynyń arqasynda biz osy qıyn ekonomıkalyq jaǵdaıdyń bastapqy kezeńin abyroımen ótkerdik», - dep atap kórsetti Áset Isekeshev sharaǵa qatysýshylarǵa arnaǵan sózinde.
Astana ákimi Joldaýdyń basty basymdyqtaryna toqtaldy, olardyń Astana qalasyn damytý baǵdarlamasyna da qatysy bar: barlyq jerde ekonomıkany ortalyqtandyrý, eldiń jahandyq básekege qabilettiligin qamtamasyz etetin jańa salalardy, ekonomıkalyq ósimniń jańa modelin qurý. Astananyń statýsy básekege qabilettilikke umtylýǵa mindetteıdi, dedi ákim.
Qala basshysy ekonomıkanyń qarqyndy tehnologııalyq jańǵyrýyna basa nazar aýdardy. Elordada jańa ındýstrııany damytý boıynsha mindetterdi iske asyrý qajet, ol - onlaın saýda, uıaly bankıng, densaýlyq saqtaý jáne bilim salalaryndaǵy sandyq tehnologııalar, osylardyń barlyǵy damyǵan elderde qarqyndy paıdalanylýdy jáne ekonomıka men jumyspen qamtýdyń qurylymyn ózgertýde.
Sonymen qatar, elordanyń aldyńǵy qatarly JOO-larynyń bazasynda ǵylymı-ınnovatsııalyq áleýetti keńeıtip, ónerkásip, kólik, logıstıka, qurylys jáne Astana ekonomıkasynyń negizin quraıtyn basqa da sektorlardaǵy eńbek ónimdiligin arttyrǵan mańyzdy.
Otyrys barysynda Ulttyq ekonomıka vıtse-mınıstri Tımýr Jaqsylyqovtyń, máslıhat depýtattarynyń jáne qoǵamdyq uıymdar ókilderiniń baıandamalary tyńdaldy. Otyrysqa qatysýshylar ákimniń Joldaý júkteıtin mindetterdi iske asyrý boıynsha bastamalary men usynystaryna qoldaý bildirdi. Qurylymdyq bólimsheler men vedomstvolardyń basshylaryna halyqpen keń kólemdi aqparattyq-túsindirý jumystaryn júrgizý tapsyryldy. Sondaı-aq, barlyq qatysýshylarǵa Memleket basshysynyń Joldaýy men mańyzdy suraqtarǵa 45 jaýap jazylǵan materıaldar taratyldy, dep habarlaıdy astana.kz.
