Elorda ákimdiginde qalany gazben qamtamasyz etý máselesi sóz boldy
ASTANA. QazAqparat - Elorda ákimdiginde apparattyq keńes ótip, onda qalanyń tynys-tirshiligen qatysty kóptegen máseleler qaraldy, dep habarlaıdy Astana ákimdiginiń medıa ortalyǵy habarlady.
Jıynda elordany gazdandyrý jumystaryn kezeń-kezeńimen iske asyrý máselesi de nazardan tys qalǵan joq. Onda tabıǵı resýrstar jáne tabıǵatty paıdalanýdy retteý basqarmasynyń basshysy Musa Tanabaev vedomstvonyń «Astana qalasynyń 2017-2018 jyldarǵa arnalǵan qorshaǵan ortany jaqsartý sharalarynyń keshendi jospary» jobasyn júzege asyrýǵa kiriskenin jetkizdi.
«Búgingi tańda qaldyqtardy jandyrý oqıǵalaryn boldyrmaýdy anyqtaıtyn múddeli memlekettik organdardyń ókilderinen quralǵan mobıldi toptar quryldy. Naqtyraq aıtqanda, jeke sektordaǵy úılerde turatyn azamattar kómirden basqa kólik dońǵalaqtary, tys, qaqpaq, sııaqty qorshaǵan ortaǵa zııan tıgizetin materıaldardy jandyrady. Bul Astana qalasynyń abattandyrý erejesiniń 15 tarmaǵyn buzý», - dep túsindirdi basqarma basshysy.
Sol sebepti Astananyń energetıka basqarmasy jeke sektordaǵy turǵyn úıler men záýlim ǵımarattardyń kezeń-kezeńmen «Global Gaz Group» JShS qatysýymen gaz otynyna kóshirý jumystaryn qolǵa alyp otyr. Osy kúni «Turan» stansasynan tómendetilgen tabıǵı gazdy (qýaty saǵatyna 10 myń tekshe) alǵashqy tutynýshy Nazarbaev Ýnıversıtetine jiberý bastaldy. Sondaı-aq, Ǵarysh ortalyǵy men Qorǵanys mınıstrligi akademııasyn qosý jumystary aıaqtaldy. 2018 jyldyń sońyna deıin gazdaýdyń ekinshi kezeńi Prıgorodnyı, Telman turǵyn alaptaryndaǵy jeke sektordaǵy úıler men Nazarbaev halyqaralyq áýejaıy aýdanyn qamtıtyn «Telman» stansasy iske qosylady dep josparlanýda.
Osyǵan oraı, Áset Isekeshev Premer-Mınıstrdiń atyna ekologııa máselelerine qatysty keńes ótkizý jóninde hat joldaýdy, Kásipkerlik jáne ónerkásip basqarmasy men ІІD jol polıtsııasy qyzmetkerlerine kómir sapasyn baqylaýdy kúsheıtýdi, qala kósheleri men aýasyn lastaıtyn kólik quraldaryn qatań qadaǵalaýdy tapsyrdy.
