Elorda ákimdigi JOO men kolledjderde bilim alý úshin 5 300 grant bóldi

NUR-SULTAN. QazAqparat - Elorda ákimi Altaı Kólginov joǵary oqý oryndary men kolledjderge 5 300 bilim granty bólingenin málim etti, dep habarlaıdy QazAqparat qala ákimdigine silteme jasap.

«Bıyl ákimdikten qalanyń joǵary oqý oryndary men kolledjderinde oqýǵa 5 myń 300-ge jýyq grant bólindi. 465 grant boıynsha taratý jumystary júrgizilip jatyr. Osylaısha, grant ıegerleriniń arasynda erekshe qajettiligi bar, áleýmettik az qamtylǵan jáne kópbalaly otbasylardan shyqqan balalar, sondaı-aq ártúrli olımpıada men konkýrs jeńimpazdary jáne t.b. bar. Túlekter pedagogıka, medıtsına, IT-tehnologııalar, quqyq, ınjener, sport, áleýmettik jumys, elektronıka jáne energetıka, shet tilderi jáne t.b. mamandyqtar men baǵyttar boıynsha oqýǵa tústi. Memleket kórsetetin kómek kásiptik bilim alý úshin eleýli qoldaý bolady», - dedi Altaı Kólginov.

Onyń aıtýynsha, Memleket basshysynyń Joldaýynda bilim berý salasyn mańyzdy baǵyttardyń biri retinde belgilegen. Prezıdenttiń tapsyrmasy boıynsha 2024 jylǵa deıin jyl saıyn pedagogterdiń jalaqysy 25%-ǵa kóteriledi, bilim berý sapasyn arttyrý boıynsha jumystar júrgizilýde, kásiptik bilim alýǵa granttar bólinedi, jalpyǵa mindetti oqý aıasynda áleýmettik az qamtylǵan otbasylardan shyqqan balalarǵa qoldaý kórsetiledi. «Mysaly, osy jyldyń ózinde jalpy oqý aıasynda 800 mln teńge bólemiz, bul bizge oqýshylardyń basym bóligin materıaldyq kómekpen qamtýǵa múmkindik beredi, ótken jyldan bastap materıaldyq kómek kólemin ulǵaıtylǵan bolatyn.

Oqý úshin qolaıly jaǵdaı jasaý maqsatynda jyl saıyn mektepter salamyz. Bıyl 15 mektep ashylady. Bul bizge shamamen 40 myń oqýshy ornyn qurýǵa múmkindik beredi, salystyrar bolsaq 2020 jyldan eki ese, al 2019 jyldan tórt ese kóp. Investıtsııalyq keńesterde 30 jekemenshik mekteptiń qurylysyn qoldadyq», - dedi ákim