Elorda ákimdigi jol jóndeýge qosymsha 32 mlrd teńge surap otyr

NUR-SULTAN. QazAqparat – Nur-Sultan qalasynyń ákimdigi jol salý jáne jóndeý jumysyna bıýdjetten qosymsha 32 mlrd teńge qajet etip otyr. Bul týraly qalalyq kólik jáne jol-kólik ınfraqurylymyn damytý basqarmasynyń basshysy Jansultan Saparbaev málim etti, dep habarlaıdy QazAqparat tilshisi.

«Biz bıyl qosymsha 25,5 mlrd teńge qarjyǵa ótinim bildirdik. Qarjy mınıstrligi atalǵan somany maquldady jáne ony maýsymnyń basynda alamyz dep otyrmyz. 25,5 mlrd teńgeniń 5 mlrd-y Almaty aýdanyna qarasty turǵyn úı alqaptarynyń ınfraqurylymyna jumsalmaq. Odan bólek, jergilikten bıýdjetten 32 mlrd teńge kerek. Osy oraıda, sizderdiń qoldaýlaryńyzdy suraımyz. Qalada jol-kólik qozǵalysy jyl sanap artyp keledi, sáıkesinshe jóndeý jáne jańa joldar salý qajet», - dedi Jansultan Saparbaev qalalyq máslıhat otyrysynda.

Sondaı-aq, basqarma basshysy jol belgilerin ornatý úshin 400 mln teńge qarjy qajettigin jetkizdi.

«Jolaýshylardy tasymaldaý salasyn sýbsıdııalaýǵa 15,8 mlrd teńge kerek. Sonymen qatar, 3,9 mlrd teńge jol qozǵalysy ınfraqurylymyn qaıta jóndeý úshin qajet. Onyń ishinde aqyldy júıeni engizý jáne 57 jańa baǵdarsham salý josparlanyp otyr», - deıdi ol.

Buǵan deıin elordada 2 kópir salynatyny týraly habarlaǵan bolatynbyz.