Elorda ákimdigi jańashyl, talantty jastardy izdeýde
ASTANA. QazAqparat - Astana qalasynda ashylǵan TSE galereıasynda elorda ákiminiń orynbasary Ermek Amanshaevpen qazirgi zamanǵy óner ókilderiniń erkin formattaǵy kezdesýi ótti, dep habarlaıdy Astana qalasy ákimdiginiń resmı saıty.
Jalpy TSE galereıasynda sýretshiler Ǵalym Madanov pen Záýresh Terekbaıdyń «CoolAge» atty kórmesi alǵash ret ashylyp otyr. Kezdesý bastalmas buryn Ermek Amanshaev sýretshilerdiń eńbekterimen tanysyp shyqty.
Erkin pikir almasý formatyndaǵy keshke jas sýretshiler, kompozıtorlar, art-menedjerler, jazýshylar, stsenarııshiler, prodıýserler, dızaınerler men basqa da shyǵarmashyl jastar qatysty.
«Men sizdermen erkin túrde pikir almasýǵa keldim. Sizderden suraq, menen jaýap formaty kerek emes. Sondyqtan sizder ıdeıalaryńyzdy, oılaryńyzdy, usynystaryńyzdy aıtyńyzdar, erkin áńgimelesý bolsyn. Sizderdeı shyǵarmashyl jastarmen kezdeskende jaqsy ıdeıalar týyndap, ony júzege asyrýǵa bolady. Mysalǵa aıtaıyn, «Jaýjúrek myń bala», «Skaz o rozovom zaıtse» fılmderi osyndaı otyrystan bastaý alǵan», - dedi Ermek Amanshaev.
Jalpy kezdesýdiń maqsaty Astana qalasynyń odan ári damýyna, órkendeýine, qalanyń bezendirilýine, ǵımarattarǵa erekshe ár berýge, turǵyndar men qonaqtardyń ómir súrýine jaıly jáne barynsha jarqyn etýge jańashyl, ıdeıasy erek jastardyń oılary men usynystaryn tyńdap, birlesip jumys jasaý.
Kezdesý barysynda sóz alǵan jastar ıdeıalary men oılaryn ortaǵa saldy. Sondaı ıdeıanyń biri, «Astana qandaı sýyq bolsa, adamdary da sondaı sýyq» degen stereotıpti joıý maqsatynda qala teatrlary men kınoteatrlarynda t.b salalarynda adamdardyń bir-birimen tanysýyna, aralasýyna múmkindik beretin joba. Onda seansqa kelgen kórermenderge mysaly, «kıno aıaqtalǵansha eki adammen tanys, úsh adamdy qushaqta» degen sııaqty jeńil tapsyrmalar berý arqyly tanysýǵa, aralasýǵa jeteleý.
Taǵy bir oı «Qala arhıtektýrasy» degen mobıldi qosymsha. Maqsaty - qaladaǵy kez kelgen ǵımarattyń, kópirdiń, eskertkishtiń taǵy basqa nysandardyń qaı jyly salynǵany, kim salǵany, qandaı stılde, qandaı materıaldan degendeı sol nysan týraly tolyq aqparat beretin mobıldi qosymsha.
Kezdesý sońynda qala ákiminiń orynbasary jınalǵandarǵa birneshe jobany júzege asyrý joldaryn birge qarastyraıyq degen usynys aıtty.
