Elorda ákimdigi zeınetkerlerge tegin syılyq taratý týraly aqparatty joqqa shyǵardy
ASTANA. QazAqparat - Astana ákimdigi Jańa jyl qarsańynda zeınetkerlerge tegin syılyq taratý týraly aqparatty joqqa shyǵardy, dep habarlaıdy «Qaz Aqparat» HAA elorda ákimdiginiń baspasóz qyzmetine silteme jasap.
«Sońǵy ýaqytta Whats App messendjeri arqyly jáne áleýmettik jelilerdiń paraqshalarynda zeınetkerlerge Jańa jylǵa oraı tegin syılyqtar beriletini týraly shyndyqqa sáıkes kelmeıtin aqparat taratý jıilep ketti.
Astana qalasynyń ákimdigi atalǵan aqparatty resmı túrde joqqa shyǵarady, óıtkeni elorda ákimdiginiń apparaty zeınetkerlerge syılyqtardy tegin taratý boıynsha sharalar ótkizýdi qarastyryp otyrǵan joq. Sondaı-aq, jalǵan aqparatty qasaqana taratqany úshin qylmystyq jaýapkershilik qarastyrylǵanyn eskertemiz. Elorda turǵyndary men qonaqtaryn resmı derekkózder taratqan shynaıy aqparatqa ǵana súıenýge shaqyramyz»,-delingen baspsóz qyzmetiniń habarlamasynda.
«1-31 jeltoqsan aralyǵynda elordada «Astana - meıirimdi qala» jalpyqalalyq qaıyrymdylyq aktsııasy ótkizilýde. Onyń maqsaty - UOS ardagerleri, barlyq toptarǵa jatatyn múmkindigi shekteýli adamdar, az qamtylǵan jáne kóp balaly otbasylar, jetim balalar, onkologııalyq aýrýlarǵa, saýl aýrýyna, týberkýlezge shaldyqqan balalar sııaqty azamattardyń jeńildikti toptaryna qamqorlyq kórsetip, kóńil bólý», dep atap ótti ákimdikten.
Qala ákiminiń bastamasymen 8 (7172) 55- 66- 55 kóparnaly jedel jeli iske qosyldy, ol boıynsha habarlasyp ataýly kómek kórsetýge bolady. Sall-ortalyqtyń qońyraýlardy qabyldaý ýaqyty: saǵat 10:00-den 20:00-ge deıin jáne senbi kúni 11:00-den 16:00-ge deıin.
