Elorda ákimdigi sport úıirmelerine 1 mlrd teńge qaryz

NUR-SULTAN. QazAqparat – Nur-Sultan qalasy dene shynyqtyrý jáne sport basqarmasynyń basshysy Samat Jylqybaev sport úıirmeleriniń quryltaıshylary men jumysshylarynyń arasynda áleýmettik shıelenis paıda bolǵanyn málim etti. Aıtýynsha, buǵan aqysyz sport úıirmelerine qarajattyń qajetti mólsherde bólinbeýi sebepker bolǵan, dep habarlaıdy QazAqparat tilshisi.

«2022 jyly memlekettik sport tapsyrystaryn iske asyrýǵa 1 304 mln teńge bólindi. 2021 jyly qarjynyń jetkiliksiz bólinýine baılanysty bıylǵy bıýdjetten qarasha-jeltoqsan aılarynda kórsetilip ketken qyzmetterdiń kredıtorlyq qaryzyn jabý úshin 324 mln 489 myń teńge tólendi. Qazirgi tańda memlekettik sport tapsyrysyna arnalǵan bıýdjet túgeldeı jumsalyp ketti. Naýryz aıynyń kredıtorlyq qaryzy 423 mln teńge bolyp tur. Sáýir aıynyń qaryzy 620 mln teńge bolady degen boljam bar», - dedi basqarma basshysy.

Sondaı-aq, ol dene shynyqtyrý jáne sport basqarmasy bıýdjetti josparlaý basqarmasyna qosymsha qarjy bólý máselesin máslıhat sessııasynda qaraý úshin ótinim bergenin atap ótti.

«Kredıtorlyq qaryzdy eskersek, jyl aıaǵyna deıin qajetti qarajat kólemi 8,4 mlrd teńgeni quraıdy. Jalpy bıyl sport úıirmelerimen 45 myń vaýcherdi qamtý kózdelgen. Astanada 4-17 jastaǵy 220 myńdaı bala tirkelgen. Onyń teń jartysyn sport úıirmelerimen qamtý úshin aıyna 2 mlrd teńge kerek. Sonda jyl saıyn bul maqsatqa 24 mlrd teńge qajet. Qazirgi ahýal sport úıirmesin usynýshylar men jumysshylarynyń arasynda áleýmettik shıelenis týǵyzyp tur», - dedi Samat Jylqybaev.

Osy aıdyń basynda Májilis depýtaty Amanjol Áltaı tegin úıirmeler men sporttyq sektsııalardy aýyl balalaryna qoljetimdi etý mehanızmderin oılastyrýdy usynǵan bolatyn.