Elorda ákimdigi shetelden kóship kelgen qazaqtarǵa qoldaý kórsetpek
Eki jaqty yntymaqtastyq kelisiminiń maqsaty - elordaǵa kóship kelgen etnıkalyq qandastarymyzǵa qoldaý kórsetý. Sondaı-aq, elge oralǵan jáne sheteldegi otandastarymyzǵa mádenı, bilim berý jáne quqyqtyq salalary boıynsha kómek qol ushyn sozý.
«Elbasynyń tapsyrmasymen «Otandastar qory» qurylyp, Ózińizdiń basshylyǵyńyzben aýqymdy ári mańyzdy jumystar júrgizilýde. Atap aıtqanda, alys jáne jaqyn shetelderden qonys aýdarǵan otandastarymyzǵa quqyqtyq, aqparattyq, rýhanı, psıhologııalyq, tildik kómekter kórsetý sharalary qabyldanyp otyr. Bul rette, jerlesterimizdiń jańa ortaǵa kirigip, qoǵamdyq ómirge erkin aralasýyna múmkindik jasaý mańyzdy sanalady. Ózderińizge málim, 2019 jyl - Jastar jyly dep jarııalandy. Onyń aıasynda biz «Otandastar» qoryn astanada qoǵamdyq-mádenı sharalardy birlesip ótkizýge shaqyramyz», - dedi Nur-Sultan qalasynyń ákimi Baqyt Sultanov.
Sonymen qatar, elorda basshysy óz sózinde, ákimdik men «Otandastar» qory arasyndaǵy ózara yntymaqtastyq týraly memorandým aıasynda nátıjeli jumystar atqarylatynyna senim bildirdi.
«Osy kelisim arqyly bas qalamyzdyń ákimdigimen birqatar tynymdy isterdi júzege asyramyz degen oıdamyz, odan bólek, birlesip júzege asyratyn birqatar sharalardy da josparlap otyrmyz. Onyń ishinde bilim, sport, mádenıet, ana tilin úıretý, bıznes-bastamalar jáne taǵy basqa. Jalpy ákimdik Nur-Sultan qalasyna kelip qonystanǵan otandastarymyzdyń elge beıimdelýine jaǵdaı jasaýǵa qashanda nıetti ekendikterin jetkizip otyr», - dedi «Otandastar» qorynyń prezıdenti Nurtaı Ábiqaev.
Onyń aıtýynsha, tarıhı Otanyna oralǵan qandas baýyrlarymyzdyń elge beıimdelýi barysynda olarǵa aqparattyq, uıymdastyrýshylyq, quqyqtyq jáne konsýltatsııalyq qoldaý kórsetýdiń mańyzy zor.
