Elorda ákimdigi oqýshylarǵa 35 myń kompıýter satyp alady
NUR-SULTAN. QazAqparat – Elorda ákimi Altaı Kólginov qaladaǵy mektepterge qansha kompıýter satyp alynatynyn aıtty, dep habarlaıdy QazAqparat tilshisi.
«Kompıýterler boıynsha tıisti másele bar. Qashyqtan oqytýdy eskere otyryp, kompıýter satyp alýǵa múmkindigi joq otbasylardy qamtyp otyrmyz. Memleket basshysynyń tapsyrmasyna oraı, Úkimet tarapynan qarjy bólindi. Qarjynyń tıisti somasy bizge de baǵyttaldy. Kompıýter satyp alýǵa jergilikti ári respýblıkalyq bıýdjetten 6 mlrd teńge bóldik», - dedi elorda ákimi «Astana» telearnasyna bergen suhbatynda.
Osy oraıda ol 35 myńǵa jýyq kompıýter alýǵa baǵyttalǵanyn aıtty.
«Osy kompıýterlerdi birinshi kezekte jetim balalar, erekshe qajettiligi bar jetkinshekter, jaǵdaıy joq otbasylar men kópbalaly otbasylar alady. Biz kompıýterlerdi qashyqtan oqytý kezeńine memleket esebinen usynamyz. Qazirgi kezde ótinimder kelip túsýde. Eger otbasynda 5 baladan artyq bolsa, onda eki kompıýter beremiz. Sonymen qatar roýterler de bar, 23 myńǵa jýyq. Osy arqyly ınternet jyldamdyǵyn joǵarylatý múmkindigi bolady», - dedi Kólginov.
