Elorda ákimdigi memleket muqtajdyǵy úshin 778 mln teńgege 50 jer ýchaskesin satyp alady
«Nur-Sultan qalalyq turǵyn úı jáne turǵyn úı ınspektsııasy basqarmasy 778 mln teńge somasyna jalpy aýdany 0,93 gektar 9 nysan boıynsha 50 jer ýchaskesin satyp alý jónindegi sharttyń jobasyn usynady. Jer ýchaskelerin satyp alý kelesi qurylys nysandary boıynsha júzege asady. Birinshi ýchaske Táýelsizdik dańǵyly men Sharl de Gol kóshesi qıylysynda ornalasqan. Bul jerge parkıngi bar kóppáterlik turǵyn úı salynady. Ekinshisi - Sharl de Gol men A.Toqpanov kóshesi qıylysyndaǵy jer ýchaskesi. Úshinshisi - parkıngi bar kóppáterlik turǵyn úı qurylysyna Qosshyǵululy men Jambyl kósheleri qıylysyndaǵy ýchaske. Tórtinshisi – parkıngi bar kóppáterlik turǵyn úı qurylysyna Kúmisbekov pen Qosshyǵululy kósheleri qıylysyndaǵy ýchaske», - dedi Ánýar Saıpov Nur-Sultan qalalyq máslıhatynyń kezekten tys sessııasynda.
Onyń dereginshe, besinshi ýchaske Y.Dúkenuly kóshesin Sh.Ýálıhanovtan Sh.Jıenqulov kóshesine deıin jol salý úshin alynady. Altynshy Sh.Aımanov kóshesindegi 3-úı mańyn abattandyrý úshin qajetti jer ýchaskesi. Jetinshi ýchaske Aǵadyr men Igilik kósheleri qıylsyn abattandyrý úshin qajet. A.Imanov pen Egemen Qazaqstan kósheleri qıylysyndaǵy segizinshi jer ýchaskesine mektep salynady. Toǵyzynshy jer ýchaskesi Óndiris turǵyn úı alabynda ornalasqan. Ol jerge de mektep salý kózdelip otyr.
«Barlyq jer ýchaskeleriniń menshik ıeleri usynylǵan ótemaqy somasymen tanystyryldy. Jazbasha kelisimderi bar», - dedi basqarma basshysy.
