Elorda ákimdigi mektep formasy men keńse taýarlaryna sertıfıkat berýdi bastady
NUR-SULTAN. QazAqparat - Nur-Sultan qalasynyń ákimdigi áleýmettik az qamtylǵan otbasylardan shyqqan balalarǵa mektep formasy men keńse taýarlaryn satyp alýǵa 200 mıllıon teńge bóldi, dep habarlaıdy QazAqparat.
«20 tamyzdan bastap áleýmettik az qamtylǵan otbasylardan shyqqan balalarǵa mektep kerek-jaraqtaryn satyp alý úshin arnaıy sertıfıkattar berý bastaldy. Qazirgi ýaqytta 8 myń sertıfıkat tapsyryldy. 78 bala sertıfıkat boıynsha kıim satyp aldy. Sonymen qatar 81 mekteptiń áleýmettik pedagogtaryna sertıfıkattar berildi. Áleýmettik pedagogtar ata-analarǵa 2300 sertıfıkat tabystady», - delingen qala ákimdiginiń málimetinde.
Sertıfıkattar kelesideı sanattaǵy otbasylar úshin qarastyrylǵan: jan basyna shaqqandaǵy ortasha tabysy eń tómengi kúnkóris deńgeıinen az bolsa jáne AÁK almasa, jetim balalar men ata-anasynyń qamqorlyǵynsyz qalǵan balalar; tótenshe jaǵdaılardyń saldarynan shuǵyl kómekti talap etetin otbasylardyń balalary; bilim berý uıymynyń alqaly basqarý organy aıqyndaıtyn ózge de sanattaǵy bilim alýshylar.
Mektep formasy men oqý quraldarynan basqa oqýshylarǵa mynadaı kómek kórsetiledi: ystyq tamaq, jazǵy saýyqtyrý lagerine joldama, mádenı jáne sporttyq sharalarǵa qatysý múmkindigi.
