Elorda ákimdigi maska tapshylyǵyna qarsy qandaı sharalar júrgizip jatyr
NUR-SULTAN. QazAqparat – Qazir dıstrıbıýterlermen qosymsha maska alý týraly kelissóz júrgizilip jatyr. Bul týraly Ortalyq kommýnıkatsııalar qyzmetiniń alańynda ótken brıfıngte Nur-Sultan qalasy ákiminiń orynbasary Baqtııar Máken aıtty, dep habarlaıdy QazAqparat tilshisi.
«Bizdiń qala turǵyndaryn dári-dármek, medıtsınalyq maska tapshylyǵy máselesi mazalaıdy. Qajetti dári-dármek pen medıtsınalyq maskamen qamtamasyz etý úshin bar kúshimizdi salyp jumys isteýdemiz», - deıdi Nur-Sultan qalasy ákiminiń orynbasary Baqtııar Máken.
Ol eki kún buryn qala basshylyǵy maskamen tolyq qamtamasyz etý týraly sheshim qabyldaǵanyn aıtty.
«Biz qalany 250 myń maskamen qamtamasyz ettik. Búgingi tańda dıstrıbıýterlermen qosymsha maska alý týraly kelissóz júrgizip jatyrmyz. Arnaıy memlekettik organdarǵa, áskerıler men medıtsınalyq qyzmetkerlerde maska artyǵymen bolýy kerek, sebebi olar úshin birinshi orynda qajetti nárselerdiń biri – osy maska. Memorandým aıasynda qabyldanǵan sheshim boıynsha, bir adamǵa satylatyn maska 5 danadan kem bolmaýy kerek. Bul eshqandaı alypsatarlyq bolmaýy úshin jasalady. Biz «SK Farmatsııa» jáne QR Densaýlyq saqtaý mınıstrligimen jumys isteımiz. Qala turǵyndary úshin maskadan bólek, dezınfektsııa jasaıtyn zattar da kerek», - deıdi ol.
