Elorda ákimdigi LRT qurylysyn toqtatý sebebin aıtty
NUR-SULTAN. QazAqparat - Elorda ákimdigi LRT jelisiniń qurylysyn ýaqytsha toqtatýǵa qatysty túsinik berdi, dep habarlaıdy QazAqparat tilshisi.
Resmı málimetke sáıkes, búginde LRT kólik júıesiniń qurylysy boıynsha alǵashqy kezeńniń jumystary aıaqtaldy. Qazirgi kezde kezekti qarjylaı transhty aýdarý boıynsha kelissózder júrgizilip jatyr. Osyǵan baılanysty qurylys jumystary ýaqytsha toqtatylyp otyr.
«Qazaqstan men Qytaı arasyndaǵy kelisimge sáıkes, atalǵan joba Qytaıdyń Memlekettik damý banki esebinen qarjylandyrylady. Búginde qurylys jumystarynyń bir bóligi aıaqtaldy. Oǵan bólingen qarjy da ıgerildi. Endi, qytaılyq konsortsıým men Qytaıdyń Memlekettik damý banki arasynda kezekti transhty bólý boıynsha kelisssózder júrgizilip jatyr. Osyǵan baılanysty jobany qarjylandyrý ýaqytsha toqtatylyp otyr. Budan bólek, ákimdik Úkimetpen birlese otyryp, ishki qarjy kózderi esebinen jobany ary qaraı iske asyrý joldaryn qarastyrýda», - deıdi baspasóz qyzmetiniń mamandary.
Eske salaıyq, búgin Úkimet otyrysynda onlaın rejimde esep bergen Nur-Sultan qalasynyń ákimi Baqyt Sultanov LRT jelisiniń qurylysy ýaqytsha toqtatylǵany týraly aıtty.
