Elorda ákimdigi koronavırýstyń aldyn alý úshin qandaı sharalar qabyldaýda
NUR-SULTAN. QazAqparat - Búginnen bastap elimizde barlyq buqaralyq sharalarǵa tyıym salyndy. Bul týraly Nur-Sultan qalalyq qoǵamdyq densaýlyqty saqtaý basqarmasynyń basshysy Sáýle Qısyqova aıtty, dep habarlaıdy QazAqparat tilshisi.
«Koronavırýsyń taralýyna jol bermeý sharalary aıasynda Úkimet búginnen bastap, ıaǵnı 13 naýryzdan buqaralyq sharalarǵa tyıym salý týraly sheshim qabyldady. Qala basshylyǵy arnaıy aldyn alý sharalaryn júzege asyrýǵa kirisedi. Koronavırýs taralýynyń aldyn alý maqsatynda Nur-Sultan ákimdigi men Qoǵamdyq densaýlyqty saqtaý basqarmasy epıdemıologııaǵa qarsy rejimdi saqtaı otyryp birqatar shara júrgizedi», - dedi ol.
Onyń atap ótýinshe, koronavırýspen kúreste Qytaıdyń, Ońtústik Koreıanyń jáne basqa da elderdiń álemdik tájirıbeleri zerdelengen. Atalǵan tájirıbeler koronavırýspen kúreste qoldanylatyn bolady.
«Koronavırýs oqıǵasy tirkelgen jaǵdaıda dıagnostıka jasaıtyn, naýqasty atalǵan juqpaly aýrýdan emdeıtin arnaıy medıtsınalyq mekemeni anyqtadyq. Vırýs juqtyrǵandardy emdeý úshin qalanyń syrtynda oqshaý turǵan ǵımarattan jeke statsıonar belgilengen. Sondyqtan vırýs juqtyrǵandar men basqa naýqastardyń joly qıylyspaıdy. Birden aıtaıyn, koronavırýsty dıagnostıkalaýda patsıentter 4 sanatqa bólinedi. Patsıentter densaýlyq jaı-kúıi jeńil, ortasha jáne aýyr retinde tekserýden ótedi. Munan bólek, úı karantıninde bolatyn patsıentter de bar», - dedi Sáýle Qısyqova.
