Elorda ákimdigi koronavırýs qaýpine baılanysty qaýipsizdik sharalaryn kúsheıtip jatyr
NUR-SULTAN. QazAqparat - Búgin elorda ákiminiń orynbasary Baqtııar Makenniń tóraǵalyǵymen koronavırýstyń taralýyn boldyrmaý jáne aldyn-alý sharalary jóninde keńes ótti, dep habarlaıdy QazAqparat qala ákimdiginiń saıtyna silteme jasap.
Іs-sharaǵa áýejaı, temirjol vokzaly, densaýlyq saqtaý basqarmasy jáne basqa da qalalyq qyzmet ortalyqtarynyń basshylary qatysty.
Qazaqstan Respýblıkasynyń Prezıdenti Q.Toqaevtyń tapsyrmasy boıynsha ortalyq jáne jergilikti atqarýshy organdar Qytaıdan Qazaqstanǵa koronavırýstyń taralýyn boldyrmaýǵa baǵyttalǵan uıymdastyrýshylyq sharalardy qabyldaýda. QR Úkimeti tarapynan vıtse-premer B.Saparbaevtyń tóraǵalyǵymen vedomstvoaralyq komıssııa quryldy, oǵan Qazaqstanda koronavırýstyń taralýyn boldyrmaý jónindegi is-sharalar josparyn daıyndaý tapsyryldy.
Ákimniń orynbasary áýejaı men vokzaldarda sanıtarlyq baqylaýdy kúsheıtýdiń mańyzdylyǵyn atap ótip, elordada koronavırýstyń taralýyn boldyrmaý úshin sharalar qabyldaýdy talap etti.
Qazirgi ýaqytta elordaǵa koronavırýstyq ınfektsııanyń ákeliný jaǵdaılaryn oqshaýlaý jáne joıý boıynsha jumys toby quryldy, halyqaralyq reısterdiń kelýine jylý baqylaý qondyrǵysy kúsheıtildi, barlyq adamdardyń mindetti baılanyssyz termometrııasy júrgizilýde, áýejaı, shekara jáne keden qyzmetteri qyzmetkerlerimen profılaktıkalyq jumystar uıymdastyryldy.
Qazir Qytaıda pnevmonııalyq ınfektsııanyń jańa túri tarap jatyr. Syrqatqa shaldyqqan jáne kóz jumǵandar sany kún sanap artyp keledi. Alǵashqy naýqastar tirkelgen kúnderi (15 qańtar) esepke 41 adam alynǵan bolatyn.
Sońǵy málimetter boıynsha koronavırýs aýrýymen aýyrǵandar sany 2,7 myń adamnan asty, 80 adam ólimi tirkelgen. Jańa koronavırýstyq ınfektsııamen aýyratyn adamdardyń kópshiligi Hýbeı provıntsııasynda (1 423, 76-sy qaıtys bolǵan). Qazaqstanmen shekaralas QHR Shyńjań-Uıǵyr avtonomııalyq aýdanynda (ShUAR) 5 adamnyń aýrýdy juqtyrǵany anyqtaldy.
Qazaqstan koronavırýsty zerthanalyq jaǵdaıda anyqtaýǵa múmkindik beretin praımerlerdi satyp alýdy bastady.
QR Densaýlyq saqtaý mınıstrligi elimizde ınfektsııa tirkelmegenin resmı málim etti.
QR Syrtqy ister mınıstrliginiń aqparatynsha, karantınge jabylǵan Qytaıdyń Ýhan qalasynda búginde Qazaqstannan 230 stýdent oqıdy. Olardyń 98-i ǵana qalada qalyp otyr. Qalǵandary demalystyń bastalýyna baılanysty Qazaqstanǵa jáne basqa da elderge ketip qalǵan.
