Elorda ákimdigi benzın baǵasynyń azyq-túlik baǵasyna keri áserin qalaı tejeıdi

ASTANA. QazAqparat – Astana qalasy ınvestıtsııalar jáne kásipkerlikti damytý basqarmasy basshysynyń orynbasary Maqsat Jańabaev qalalyq kommýnıkatsııalar qyzmetinde ákimdik benzın baǵasynyń azyq-túlik baǵasyna keri áserin qalaı tejeıtinin aıtty, dep habarlaıdy QazAqparat tilshisi.

«Búginnen bastap benzın baǵasy qymbattamaq. Bul qaladaǵy azyq-túlik baǵasynyń qymbattaýyna ákelmeı me?» - dep surady BAQ ókili.

Basqarma ókili bul baǵytta birneshe shara qabyldanǵanyn aıtady.

«Shynymen de qazir janar-jaǵarmaı baǵasynyń ósýi áleýmettik mańyzy bar azyq-túlik baǵasynyń ósýine áser etýi múmkin ekenin túsinip otyrmyz. Bul baǵytta qajetti sharalardyń bárin qabyldaımyz. Halyqty áleýmettik mańyzy bar azyq-túlik taýarymen qamtamasyz etý úshin kúzgi maýsymaralyq kezeńde naryqqa shyǵatyn kókónis pen birqatar azyq-túlik ónimin jetkizshýilerdiń ótinimderin qarastyryp jatyrmyz. Qazirdiń ózinde 2023 jyldyń 1 qyrkúıeginen 2024 jyldyń mamyryna deıin kókónis jetkizý týraly 2 ótinimdi maquldadyq», - dedi ol.

Ákimdik ókiliniń aıtýynsha, baǵa osy sharalar aıasynda belgilengen shekten aspaýy kerek.

«Mysaly, kartop baǵasy 125 teńgeden, sábiz baǵasy 120 teńgeden, qyryqqabat 115 teńgeden, makaron ónimderi 280 teńgeden aspaýy kerek. Al, naryqtaǵy baǵanyń ózi belgilengen mólsherden túsip jatsa, turaqtandyrý baǵasy odan 10 paıyz tómen bolyp belgiledi», - dedi Maqsat Jańabaev.