Elorda ákimdigi balkony «qısaıǵan» kópqabatty úı týraly pikir bildirdi
NUR-SULTAN. QazAqparat – Elordada balkony qısaıǵan turǵyn úı resmı túrde paıdalanýǵa berilmegen jáne oǵan turǵyndardy zańsyz ornalastyrǵan. Bul týraly elordalyq qalalyq orta sapasy jáne baqylaý basqarmasy basshysynyń orynbasary Dáýlet Dosqulov aıtyp berdi, dep habarlaıdy QazAqparat tilshisi.
«Orbıta» turǵyn úı kesheni problemalyq nysan sanalady, ony «Tamyz ınvest grýpp» AQ turǵyzǵan. Bul uıymnyń basshylary QR ІІM júrgizgen qylmystyq is boıynsha 11 jylǵa bas bostandyǵynan aıyrylǵan», - dedi D. Dosqulov qalalyq ákimdikte bergen suhbatynda.
Onyń aıtýynsha, úı paıdalanýǵa berilmese de, úı salýshylar 6 jyl buryn turǵyndardy zańsyz ornalastyrǵan.
«Ákimdiktiń úleskerler máselesin sheshý boıynsha sharalar jospary bar. Onyń aıasynda úıdiń konstrýktsııasyny nyǵaıtý, qasbetin aýystyrý jáne resmı túrde paıdalanýǵa berý kózdelgen», - dedi Dáýlet Dosqulov.
Eske sala ketsek, «Orbıta» turǵyn úı kesheni páterlerdiń birinde balkon ornynan «jyljyp» ketip, eden dirildegen. Qalalyq ákimdiktiń habarlaýynsha, olar problemaly turǵyn úı týraly biledi. Qazirgi ýaqytta ol jaqta tehnıkalyq tekserý júrgizilip jatyr, odan keıin úıdiń apattyq deńgeıi anyqtalady.
