Elorda ákimdigi azyq-túlik pen ózge taýarlardyń qalaı jetkiziletinin túsindirdi
NUR-SULTAN. QazAqparat – Nur-Sultan qalasy Investıstıtsııalar jáne kásipkerlikti damytý basqarmasynyń basshysy Erlan Bekmyrzaev karantın kezinde elordaǵa azyq-túlik pen ózge de taýarlardyń qalaı jetkiziletinin túsindirdi, dep habarlaıdy QazAqparat.
«Qalaǵa taýar jetkizý boıynsha búgin túnde elordaǵa kirý jáne shyǵý shekteledi, blokposttar qoıylǵan. Kórshi oblystardyń jetkizýshileri, mysaly, et jáne qurylys materıaldaryn jetkizýshiler durys aqparat almaǵan tárizdi. Azyq-túlik taýarlaryn kirgizýge esh tyıym salynǵan joq. Barlyq jetkizýshilerdi qaýesetterge senbeýge, tek resmı aqparatqa súıenýge shaqyramyz», - dedi E. Bekmyrzaev qala ákimdiginde ótken onlaın brıfıngte.
Onyń aıtýynsha, azyq-túlik ónimderi qala aýmaǵyna táýlik boıy kirgiziledi, al ózge taýarlar saǵat 22.00-den tańǵy 5-ke deıin ótedi.
«Bul úshin azyq-túlik, negizgi taýarlar jáne ózge de taýarlardy alyp ótetin jasyl dáliz quryldy. Sonymen birge, azyq-túlik ónimderin nemese basqa ónimderdi jeńil kólikpen ákelýge tyıym salynady. Sondyqtan júrgizýshiler men ekspedıtorlar eń aldymen, betperde, jeke kýálik, kólik quralynyń tehnıkalyq tólqujaty, sondaı-aq taýarlardyń ilespe qujattaryn kórsetýi qajet. Júrgizýshiler men ekspedıtorlardyń qujattary men densaýlyq jaǵdaıy baqylaý-ótkizý pýnktterinde tekseriledi. Kólik belgilengen jerge jetedi de, júk túsirilip, kólik qaıtarylady, marshrýttan aýytqýǵa jol berilmeıdi. Barlyq júktemeler Internette onlaın rejimde baqylanady», - dedi Erlan Bekmyrzaev.
Buǵan deıin basqarma basshysy bir aıǵa jetetin azyq-túlik qory bar ekenin habarlaǵan edi.
Sondaı-aq, karantın kezinde jumysyn toqtatpaǵan meıramhanalar anyqtalyp, jaýapqa tartyldy.
