Elorda ákimdigi Astananyń jasyl beldeýine qosymsha 15 myń gektarǵa jýyq jer bóldi
ASTANA. QazAqparat - Elorda ákimdigi Astananyń jasyl beldeýine qosymsha 15 myń gektarǵa jýyq jer bóldi. Bul týraly búgin elordanyń jasyl beldeýin damytý jumystarymen tanystyrǵan «Astana ormany» JShS-niń dırektory Máýlen Samambetov aıtty.
«Qazirgi ýaqytta Astananyń jasyl beldeýin damytýdy 2 kezeńge bólýge bolady. Birinshi kezeńi 1998-2004 jyldary aralyǵyn qamtyǵan edi. Alǵashqy kezeńde negizinen qylqan japyraqty aǵashtar otyrǵyzyldy. Búginde Astananyń jasyl beldeýiniń jalpy aýmaǵy 14827 gektardy quraıdy. 2009 jyly Qazaqstan Prezıdenti Nursultan Nazarbaev kezekti márte jasyl beldeýge kelgeninde muny tutas orman alqabyna aınaldyrý týraly tapsyrma bergen edi. Osy sátten bastap ekinshi kezeń bastaldy», - dedi ol.
JShS dırektorynyń aıtýynsha, elordanyń jasyl beldeýin júzege asyrý 6 satyǵa bólingen. 2012-2016 jyldary jobanyń 1,5 jáne 3 myń gektardy quraıtyn 2 satysy tolyqqandy júzege asyryldy. Osy ýaqyt aralyǵynda 1 mln. 846 myń túp aǵash otyrǵyzyldy. Onyń 56 paıyzy qylqandy japyraqty, al qalǵan 44 paıyzy jaı aǵashtardy quraıdy.
«2017 jyldan bastap biz jobanyń 3-shi satysyn júzege asyra bastaımyz. Eń birinshi kezekte áýejaı aýmaǵyndaǵy 459 gektar ýchaskeni ıgerý qolǵa alynyp, ondaǵy jumystar eki jylǵa sozylady. Al qalǵan satylary qazirgi ýaqytta jobalanýda. Jalpy, 2030 jylǵa deıin bul jumystar tolyǵymen oryndalady. Aıta keterligi, Astana qalasynyń ákimdigi bizge qosymsha 14827 gektar jer bólmek. Qazirgi ýaqytta onyń 8500 gektary berildi. Demek, 1-2 jyldan keıin bizdiń beldeýdiń aýmaǵy shamamen 32 myń gektarǵa jetedi», - dedi M.Samambetov.
Sonymen qatar onyń atap ótýinshe, Astana jasyl beldeýi aýmaǵynda velosıpedpen serýendeýge arnalǵan jol salý jumystary 2 kezeńge bólingen. 2011 jyly uzyndyǵy 4127 metrdi quraıtyn jol paıdalanýǵa berilgen. Qazirgi ýaqytta 2 kezeńi aıaqtalýǵa jaqyn. Qurylys jumystary osy aıdyń sońynda aıaqtalǵannan keıin velosıpedpen serýendeýge arnalǵan joldyń uzaqtyǵy 19127 metrdi quraıtyn bolady. Bul jol Qorǵaljyń jáne Qaraótkel tas joldaryn jalǵastyrady.
Aıta keterligi, búgin Astana jasyl beldeýiniń damý barysyn elordalyq jýrnalısterge tanystyrý barysynda ormanǵa 200 qyrǵaýyl jiberildi. Jalpy, búginde bul ormanǵa shamamen 8 myń qyrǵaýyl jiberilgen.
