Elorda ákimdigi Astana kúnine oraı páterler beriletini týraly SMS-habarlamalardy joqqa shyǵardy

«Qalamyzdyń turǵyndaryna SMS-habarlamalar túse bastady. Onda: «2009 jyly memlekettik turǵyn úı qurylysynyń baǵdarlamasy boıynsha óttińiz, sizdi qala kúninde, 6 shildede páter kiltin berý úshin qalalyq ákimdikte kútedi» jáne t.b. Sońynda qala ákimdigi dep jazylǵan. Muny kim jáne qandaı maqsatpen jasaıtynyn quqyq qorǵaý organdary anyqtaıdy dep oılaımyn», - dedi elordalyq turǵyn úı basqarmasynyń basshysy Rýslan Ahmetov.

Ol ákimdik SMS-habarlamalar taratpaıtynyn atap ótti. Barlyq resmı habarlandyrýlar ákimdiktiń jáne qalalyq basqarmalardyń resmı saıttarynda nemese BAQ-ta jarııalanady.

«Qala kúninde memlekettik turǵyn úı qurylysynyń baǵdarlamasy aıasynda páter kiltterin tapsyrý josparlanbaǵan. Atalǵan baǵdarlama aıaqtaldy. Memlekettik baǵdarlama boıynsha ótken azamattar páterlermen qamtamasyz etildi. Endi qalǵan 50 turǵyn ústimizdegi jyldyń birinshi jartyjyldyǵynda jańa páterlerge qonystanatyn bolady», - dedi R.Ahmetov.

Eske sala keteıik, osyǵan deıin azamattar jeke úı qurylysy úshin jer ýchaskesi bólinedi degen aqparatty durys túsinbegeni habarlandy. Ákimdikte jeke turǵyn úı qurylysy úshin jer ýchaskelerine suranys qalany damytýdyń bas josparynyń jobalyq qýatynan 7 esege artyq ekenin aıtty.