Elorda ákimdigi 2017 jyldyń áleýmettik-ekonomıkalyq qorytyndylaryn shyǵardy
ASTANA. QazAqparat - Elorda ákimdiginde 2017 jyldyń qorytyndylary shyǵaryldy.
Ákimdiktiń baspasóz qyzmeti keltirgen málimetter boıynsha, barlyq áleýmettik-ekonomıkalyq ındıkatorlar boıynsha ósim baıqalǵan.
Ýaqytynda atqarylǵan jumystyń arqasynda qurylys kólemi ulǵaıyp, ósim 100,8%-ke jetken.
Bir jyl ishinde 2 360 myń sharshy metr baspana paıdalanýǵa berildi. Onyń ishinde memlekettik baǵdarlamalar aıasynda 7 turǵyn úı kesheni (1062 páter) boı kóterdi.
Jyl basynan elordada ShOB-tiń 12,7 myń sýbektisi tirkeldi. Bul - ótken jyldyń sáıkes kezeńimen salystyrǵanda 14% artyq kórsetkish.
Eńbek naryǵynda 19 myńnan astam jańa jumys orny ashyldy. Olardyń 15 myńǵa jýyǵy - ShOB salasyndaǵy jumys oryndary.
Áleýmettik sala nysandarynyń jelilerin keńeıtý maqsatynda 5 mekteptiń janynan 2600 orynǵa laıyqtalǵan qosymsha ǵımarattar salynyp, paıdalanýǵa berildi, 480 orynǵa arnalǵan 2 bala baqsha ashyldy. Jalpy jáne kásibı bilim beretin oqý ortalyǵy ǵımaratynyń janynda, «Psıhonevrologııalyq medıtsınaly-áleýmettik mekeme» MM-niń janynda 100 orynǵa arnalǵan qosymsha ǵımarat paıda boldy.
Infraqurylymdy damytý baǵyty boıynsha qurylys-montajdyq jumystardyń barlyǵy, «Taldykól» aqaba sýlardy jınaqtaǵyshyn joıý jobasynyń aıasyndaǵy tehnologııalyq jabdyqtyń montajy aıaqtalyp, ónimdiligi táýligine 200 myń kýb metrdi quraıtyn búgingi tańda jumys istep turǵan nasosty-fıltrlik stantsııa qaıta jóndeýden ótti.
Nóser kanalızatsııasyn damytý aıasynda № 27 kóshedegi nóser kanalızatsııasynyń tazartý ǵımarattarynyń 3 kesheni iske qosyldy. Munymen qosa, Esil ózenine deıingi, Rysqulov kóshesinen №31 kóshege deıingi aralyqta jatqan nóser kanalızatsııasynyń sý tastaıtyn kollektorlarynyń qurylysy aıaqtaldy.
Qurylys esebinen jylý jelileriniń 50 shaqyrymy men elektr jelileriniń 25 shaqyrymy, «Turan», «Jańa jol», «Báıterek» shaǵyn stantsııalary, JEO-1 jáne JEO-2 jóndeýden ótti.
Qalada 177 aýla abattandyrylyp, balalarǵa arnalǵan 1272 oıyn elementteri ornatyldy, 21 sport alańy uıymdastyrylyp, TKSh jańǵyrtý baǵdarlamasy boıynsha kóppáterli 9 úıde kúrdeli jóndeý jumystary júrgizildi.
Astana qalasy boıynsha mundaı nátıjelerge qol jetkizýge ındýstrııalandyrý, qurylys, shaǵyn jáne orta bıznes baǵdarlamalaryn júzege asyrý óz septigin tıgizdi.
