Elorda ákimdigi 20 jer ýchaskesin satyp alady
NUR-SULTAN. QazAqparat - Nur-Sultan qalasynyń ákimdigi jylý magıstraldary men kóshelerdiń qurylysy úshin 20 jer ýchaskesin satyp alatyn boldy, dep habarlaıdy QazAqparat tilshisi.
«Jalpy aýmaǵy 2 gektar bolatyn 20 jer ýchaskesin 1 mlrd 681 mln teńgege satyp alý týraly joba bar. Jer ýchaskelerin satyp alý myna nysandardyń qurylysy boıynsha júrgizilip jatyr: ınjenerlik jelilerdiń besinshi jylý magıstrali men Bógenbaı batyr, Saryarqa, Kenesary, Kúmisbekov kósheleriniń aýmaǵyndaǵy jol; №64 mektep-lıtseıine qosymsha qurylys; Qabanbaı batyr kóshesi, Turan, Saraıshyq, Abaı kóshesi arqyly Tilendıev dańǵylynynan Seıfýllın kóshesine, odan ary Jangeldın, Kúmisbekov, Beısekov kóshesine deıingi ınjenerlik jeliler men joldar; Buqar jyraý kóshesi. Kelisimder boıynsha barlyq jobalar jer ýchaskeleriniń ıelerimen turaqty komıssııa otyrystarynda qarastyryldy», - dedi Nur-Sultan qalalyq qurylys jáne turǵyn úı saıasaty basqarmasynyń basshysy Rýslan Ahmetov qalalyq ákimdikte máslıhattyń kezekti sessııalyq otyrysynda.
Máslıhat depýtattary basqarma basshysynyń bul usynysyn qoldady.
