Elorda ákimdigi 18 qabatty úıde lıft «qulaý» oqıǵasyna qatysty túsinik berdi
NUR-SULTAN. QazAqparat - Nur-Sultan qalasy ákimdigi 18 qabatty «Jaına» turǵyn úı kesheninde turatyn azamattyń lıft qulap ketkeni jaıly jazǵan habarlamasyna túsinik berdi, dep habarlaıdy QazAqparat tilshisi
Elorda turǵyny Іnstagram jelisine 18 qabatty úıdiń lıfti qulap ketkenin jarııalaǵan bolatyn.
Ol «Jaına» turǵyn úı keshenindegi lıft bos kúıde qulaǵany týraly habarlady.
«Bolǵan jaǵdaıǵa qatysty kim tekserý jumystaryn júrgizedi? Bul úıde balaly otbasylar turady. Bireý zardap shekse, kim jaýap berer edi? Turǵyn úıdiń páter ıeleri kooperatıvi daý-damaıdy basý úshin lıftke qyzmet kórsetetin kompanııany aýystyryp, jóndeý jumysyn turǵyndardyń qarajatyna júrgizgisi keledi», - dep jazǵan qala turǵyny.
Nur-Sultan qalasy ákimdiginiń qalalyq qorshaǵan ortany baqylaý jáne sapasyn basqarý basqarmasynyń málimetinshe,«Jaına» turǵyn úı keshenindegi lıftke «Lıft master» kompanııasy qyzmet kórsetedi jáne osy úıdegi bloktardyń birindegi júk lıftisinen aqaý shyqqan.
«Úı turǵyny túsirip alǵan OTIS markaly lıft 25 qazan kúni jóndeý jumystaryn jasaý maqsatynda toqtatylǵan. Lıft kompanııasy ony jóndeý jumystarynyń quny 1,5 mln teńge dep baǵalap, akt jasaǵan. Buǵan kóńili tolmaǵan turǵyn atalǵan jaǵdaıǵa nazar aýdartý maqsatynda lıftiniń qulap ketkeni týraly jalǵan aqparat jazǵan. Qazirgi ýaqytta qalǵan lıftiler qalypty jaǵdaıda jumys istep tur», - deıdi Nur-Sultan qalasy ákimdiginiń qalalyq qorshaǵan ortany baqylaý jáne sapasyn basqarý basqarmasynyń baspasóz qyzmeti.
