Elorda 2026 jyly Besinshi dúnıejúzilik kadetter oıynyn ótkizedi
ASTANA. KAZINFORM – 2026 jyly Qazaqstannyń bas qalasy – Astana Halyqaralyq áskerı sport keńesiniń (CISM) Besinshi dúnıejúzilik kadetter oıyndary ótetin alańǵa aınalady.
Mundaı sheshim uıym prezıdenti Rolım Gomestiń tóraǵalyǵymen Abý-Dabıde ótken Áskerı sport keńesiniń álemdik sımpozıýmynda qabyldandy.
Qazaqstannyń aýqymdy jarysty qabyldaýǵa daıyn ekeni týraly Qorǵanys mınıstrligi Sport komıtetiniń tóraǵasy polkovnık Arman Ábeýov CISM Dırektorlar keńesine múshe elderiniń 15 ókili aldynda málimdedi. CISM basshylyǵy elimizdiń sporttyq ınfraqurylymynyń deńgeıin, uıymdastyrýshylyq áleýetin jáne oıyndarǵa júıeli daıyndyqty joǵary baǵalady.
Kadet oıyndarynyń baǵdarlamasyna bes sport túri enedi: boks, qazaq kúresi, jeńil atletıka, júzý jáne shaǵyn fýtbol. Bul jarystarǵa álemniń túkpir-túkpirinen úzdik kýrsanttar men áskerı oqý oryndarynyń ókilderi qatysady dep kútilýde.
Aldaǵy oıyndar bolashaq ofıtserler arasyndaǵy dostyqty nyǵaıtýǵa, tájirıbe almasýǵa jáne patrıottyq ári sporttyq qundylyqtardy dáripteýge arnalǵan mańyzdy alań bolmaq.
Qazaqstan úshin mundaı halyqaralyq jastar týrnırin ótkizý – ulttyq áskerı-sporttyq júıeniń joǵary deńgeıde damyǵanynyń aıǵaǵy. Búginde elimizde Qorǵanys mınıstrligi, Ulttyq ulan, Tótenshe jaǵdaılar mınıstrligi jáne Shekara qyzmetiniń qaramaǵyndaǵy alty áskerı joǵary oqý orny men Qorǵanys mınıstrliginiń áskerı-sport kolledji jumys isteıdi.
Buǵan deıin Dúnıejúzilik kadetter oıyndary Ankarada (Túrkııa, 2010), Salınasta/Kıtoda (Ekvador, 2014), Sankt-Peterbýrgte (Reseı, 2022) jáne Karakasta (Venesýela, 2024) ótken bolatyn.
Aıta keteıik, Astanada kúzgi áskerge shaqyrý naýqany júrip jatyr, desant, arnaıy jáne ǵylymı bólimshelerge kimder baratyny mynaý siltemede habarlandy.
