Eloradada memlekettik qyzmetkerler memlekettik tilden bilim jarystyrýda
ASTANA. Qyrkúıektiń 14-i. QazAqparat /Jasulan Amanbaıuly/ - Elordada Qazaqstan halqy tilderiniń HІІ qalalyq festıvali aıasynda jergilikti memlekettik organdarda, memlekettik uıymdar men kásiporyndarda qyzmet isteıtin mamandar arasynda «Memlekettik til - memlekettik qyzmette» atty qalalyq baıqaý ótýde,
dep habarlaıdy QazAqparat.
Tilderdi damytý basqarmasy uıymdastyryp otyrǵan dástúrli baıqaýǵa qaladaǵy Almaty, Saryarqa jáne Esil aýdandaryna qarasty árbir basqarma men memlekettik uıym top quryp saıysatyn bolady. Jalpy bıylǵy baıqaýǵa 12 komanda qatysýda. Uıymdastyrýshylar komandalardy 5 kezeńdik synnan ótkizedi.
«Memlekettik til - memlekettik qyzmette» degen shara jyl saıyn ótkizilip, dástúrli bolyp qaldy. Qazir baıqaýda ár top óz komandasyn tanystyrady. Sonan keıin óz salalarynda ómirden bir kórinis kórsetedi, is-qaǵaz tilinde jarysady. Aýdarmashylar aıtylǵan sózderdi birden adaryp berý biliktilikterimen synasady», deıdi Tilderdi damytý basqarmasynyń bastyǵy Orazkúl Asanǵazy.
Tilderdi damytý basqarmasy basshysynyń aıtýynsha, memlekettik qyzmette qazaq tiliniń qoldaný aıasy keńeıip keledi. «Qazir jınalystarda qazaqsha sóıleıtinderdiń sany artty. Tolyq qazaq tilinde jınalys ótkizetin mekemeler kóbeıýde. Mysaly, mádenıet, bilim salalary memlekettik tilge tolyǵymen kóshti», dep atap kórsetti ol.
Baıqaýdyń birinshi kezeńinde qatysýshylar toptyń ataýyn, uranyn, maqsaty men mindetterin tanystyrsa, kelesi «Іs júrgizýdegi sóz qoldaný jáne pikirsaıys» kezeńinde is júrgizýge qatysty qujattardyń júrgizilýi týraly, jumys barysyndaǵy taldaý, saraptaý, esep berý, baıandama jasaý, resmı sóz sóıleý usynystar aıtý boıynsha kórinis kórsetetin bolady. Úshinshi kezeń «Qazaq tili jańa tehnologııalar áleminde» dep atalady. Al «Termınder álemi» kezeńinde top músheleri berilgen termınderdiń qazaqsha balamalaryn aıtyp berýi tıis.
Sońǵy «Qazaq sózi» kezeńinde qatysýshy til týraly danalyq sózderdi, áıgili ǵalymdar men saıası qaıratkerlerdiń sózderin nasıhattaý nemese memlekettik tilge qatysty qyzmet babyndaǵy usynys, oı-pikirin ortaǵa salý, resmı qujattardan dáıeksóz alyp, ony qorytyndylaı bilýi kerek.
