Eloradada aldanyp qalǵan 600-ge tarta úlesker baspanaly bolady
NUR-SULTAN. QazAqparat – Jańa jyl qarsańynda Nur-Sultannyń «saqaldy qurylys» atanǵan problemalarynyń birine núkte qoıyldy. Bul týraly qala ákimi Altaı Kólginov instagram paraqshasynda jazdy, dep habarlaıdy QazAqparat.
«Bul qurylys segiz jylǵa sozylǵan – «Jaǵalaý-3» TK, 30-blok. Úıdiń ózi paıdalanýǵa berildi. Qazir turǵyndarǵa kópten kútken páterlerine tirkeýge turýyna, emhanalarǵa, balalaryn mektepke, balabaqshaǵa jáne t.b. tirkeýine múmkindik beretin tehnıkalyq pasporttary úlestirilip jatyr. Turǵyn úı kesheninde alaıaqtarǵa aldanyp qalǵan 600-den astam otbasy bar. Úleskerlermen ótken alǵashqy kezdesýimizde uzaq kútken páterlerine qonystana alatynyna senimsizdik tanytqan edi. Alaıda qurylysty aıaqtaý úshin jumysymyzdy kezeń-kezeńimen júrgizdik», - dep jazady qala basshysy.
Altaı Kólginov túıtkildi máseleler kóp bolǵanyn, bul úıdiń qasbeti, ınjenerlik jeliler (sýmen jabdyqtaý, jylytý, káriz jelisi, elektr energııasy), kireberisterdiń ishki árleýi, lıftiler, qujattardyń tolyq tizbesiniń bolmaýy, abattandyrý máseleleri sheshilmegenin aıtady.
«Qazir problemanyń basym bóligi sheshildi, tek mamandar atqaratyn keıbir tehnıkalyq jumystary ǵana qaldy», - deıdi ol.
