«QazAvtoJol» respýblıkalyq joldarǵa qatysty 12 myńnan astam ótinimdi óńdedi
ASTANA.KAZINFORM — Bıyl 4-10 mamyr aralyǵynda 1403 baılanys ortalyǵynyń operatorlary respýblıkalyq joldarǵa qatysty 12 myńnan astam ótinimdi qabyldap, óńdegen.
— Júrgizýshiler negizinen aqyly joldardyń tólemi, buzylǵan kólikterdi súıreýge kómek kórsetý jáne basqa da mańyzdy máseleler boıynsha habarlasqan. Azamattarǵa qolaıly ári jedel aqparat berý úshin ınteraktıvti daýystyq menıý (IVR) júıesi iske qosylǵan. Osy júıeniń kómegimen 776 ótinim operatorlardyń qatysýynsyz avtomatty túrde óńdelse, operatorlar 10 860 qońyraýǵa jaýap berdi, — delingen habarlamada.
Sondaı-aq, messendjerler arqyly 1 169 ótinim qabyldandy. Respýblıkalyq joldarǵa qatysty eń kóp habarlamalar Aqmola, Qaraǵandy jáne Túrkistan oblystarynan kelip tústi. Barlyq ótinimder reglamentke sáıkes ýaqtyly oryndaldy.
Eske sala keteıik, buǵan deıin bıyl Qazaqstanda 6 jańa aqyly jol ýchaskesi engizilýi múmkin ekenin jazdyq.
