El óńirlerinde askók pen aqjelken qanshadan satylyp jatyr
ASTANA. KAZINFORM — Jaz kelisimen baý-baqsha pisip, kókónis qoljetimdi bolady. Onyń qatarynda tamaqtyń dámin keltiretin askók te bar. Óńirlerdegi aqjelken, askók jáne rýkola baǵasyna sholý jasaǵan edik.
Askókti kóbine kelilep emes, ýystap oralǵan túrde satady, ol shamamen 100-150 gramm turady.
Baǵasyna kelsek, bazar men sýpermarketterde aıyrmashylyq bar, bul jerde kólemine de baılanysty.
Degenmen jazdygúni tutynýshylardyń deni askókti saıajaıshylardan tikeleı alǵysy keledi. Olarda baǵa arzan bolýy múmkin.
Mysaly, Petropavlda bir ýys askók fermerlik bazarda 150 teńge turady, al sýpermarkette kelisi 1 700 teńgeden satylyp jatyr.
Jalpy óńirlerde Aqtóbe men Atyraýdy almaǵanda, askók baǵasy boıynsha asa aıyrmashylyq joq. El aýmaǵynda askók pen aqjelkenniń bir ýysy 100-300 teńge aralyǵynda turady.
Al rýkola 100 teńgeden 1200 teńgege deıin satylady. Onlaın sýpermarketterde qaptalǵan 125 gramdyq askók 2 100 teńgege satyp ala alasyz.
Eń arzan rýkola Túrkistan men Oralda — 100-150 teńge. Petropavl, Taldyqorǵan, Shymkent, Qaraǵandy jáne Pavlodarda rýkolanyń bir ýys býmasy 300 teńge turady.
Taraz, Astana, Semeı men Óskemende 300-350 teńge, Qostanaı, Aqtaý, Almaty jáne Jezqazǵanda 400-450 teńge, Qyzylordada 500 teńge, Kókshetaýda 700 teńgeden satylady.
Al Aqtóbe, Qonaev jáne Atyraýda 950, 1000 jáne 1200 teńge turady.
Aqjelkenniń bir ýys býmasy Taraz, Qyzylorda, Túrkistan, Aqtaý, Petropavl, Almaty, Qostanaı, Shymkent, Qonaev, Jezqazǵan, Taldyqorǵan jáne Kókshetaýda 100-200 teńge aralyǵynda satyp alýǵa bolady.
Kókshetaý, Oral, Semeı, Pavlodar, Óskemen jáne Astanada sál qymbattaý, býmasy 200 teńgeden bastalyp, 280 teńgege deıin jetedi.
Eń qymbat aqjelkenniń baǵasy Aqtóbede — 515 teńge jáne Atyraýda — 700 teńge.
Askók — Taraz, Qonaev, Qyzylorda, Túrkistan, Taldyqorǵanda 50-100 teńgeden. Qostanaı, Petropavl, Qaraǵandy, Aqtaý, Shymkent, Almaty, Kókshetaý, Jezqazǵan jáne Oralda 140 teńgeden 200 teńgege deıin barady.
Semeı, Pavlodar, Óskemen jáne elordada bir ýys býma askók úshin 230-270 teńge tóleısiz. Al Aqtóbe men Atyraýda askók 500 teńgeden joǵary.
