Elnur Beısenbaev Sherzat isi týraly: ІІM tıimsiz pozıtsııa ustanyp otyr

ASTANA. KAZINFORM – Májilis depýtaty Elnur Beısenbaev Talǵardaǵy Nurymovtar áýletiniń basyndaǵy aýyr jaǵdaıdy Іshki ister mınıstrliginiń ustanǵan álsiz pozıtsııasy odan saıyn ýshyqtyryp jatqanyn aıtty.  

– Quqyq qorǵaý organdary naqty aqparatty der kezinde zańmen belgilengen mólsherde berip otyrý kerek. Sonda bizde kimniń kináli, kimniń kinásiz ekeni týraly naqty aqparat bolady. Al bizde Іshki ister mınıstrligi osyndaı rezonansty jaǵdaıdan keıin ý-shýdy basý úshin taǵy bir aqparattardy, vıdeolardy bólisip jatady. Meniń oıymsha, bul – álsiz pozıtsııa. Osyny úırený kerek. Qazir búkil álemde solaı. Eýropanyń damyǵan memleketterinde rezonansty ister boıynsha aldyn ala tergeý amaldarynda aıtýǵa ruqsat dúnıelerdi reglamenttep, ástin-ástin berip otyrady. Bizde osyndaı tetiktiń joqtyǵynan qoǵamda túrli oı týdyratyn azamattardyń pikirine aralasyp ketip jatamyz, - dedi depýtat jýrnalısterdiń suraǵyna bergen jaýabynda.

Sondaı-aq ol Sherzat isin quzyrly organdardyń qatysýymen Parlamentte qaraý kerek degen saryndaǵy usynystarǵa pikir bildirdi. 

– Bul rezonansty is bolyp tur ǵoı. Qazir tergeý amaldary bir retke kelýi kerek. Mundaı dúnıeniń Parlamentte talqylanýy sot protsesine, tergeý amaldaryna tikeleı áser etýi múmkin. Bul jerde aıtylǵan pikir naqty dálel, dáıektermen kómkerilmegennen keıin depýtattardyń túıgen oıy ekiudaı bolýy múmkin. Sondyqtan tergeý amaldary naqty bir baǵytqa túspeıinshe Parlamentte talqylaý júrgizýdiń qajeti joq dep oılaımyn, - dedi depýtat.