Elnur Beısenbaev Anna Bashınskaıa týraly – Partııa halyqaralyq isterge aralaspaıdy

ASTANA. QazAqparat – Májilistegi «Amanat» partııasy fraktsııasynyń jetekshisi Elnur Beısenbaev áleýmettik jelide orynsyz pikir jazǵan depýtat Anna Bashınskaıa jóninde pikir bildirdi, dep habarlaıdy QazAqparat.

«Anna Bashınskaıa rasynda da partııa músheligine jańadan kelgen edi, 8-shi shaqyrylymda máslıhat depýtaty atanǵan. Iá, abaısyzda qatelikke boı urdy. Ony moıyndady. Áleýmettik jelide pikirin bildirdi. Depýtattyq mandatyna baılanysty sheshimin shyǵaryp, depýtattyqtan ketti», - dedi E. Beısenbaev Májilis kýlýarynda.

E. Beısenbaevtyń aıtýynsha, saıası organızm retinde partııada da qatelikter bolýy múmkin.

«Ol partııanyń repýtatsııasyna nuqsan keltirdi dep aıta almaımyn. Partııa halyqaralyq isterge aralaspaıdy. Ózge memleketterdiń prezıdentteriniń málimdemelerine biz pikir bildirmeımiz. Bul – tikeleı «Amanat» partııasynyń pozıtsııasy», - dedi ol.

Aıta keteıik, osyǵan deıin Almaty qalasy máslıhatynyń depýtaty Anna Bashınskaıa Ýkraına prezıdenti Vladımır Zelenskııdiń «Deutsche Welle» basylymyna bergen suhbatynda Qyrymdy qaıtarý týraly málimdemesine «Zelenskıı myrza, Qyrymnan góri Túrkııa durys, ol jaqtyń aýa raıy qolaıly», degen maǵynada pikir bildirdi.

Depýtattyń bul pikiri áleýmettik jeli qoldanýshylarynyń narazylyǵyn týdyryp, olar mandatyn tapsyrýyn talap etti.

Keıinirek A.Bashınskaıa osy pikiri úshin qazaqstandyqtardan keshirim surap, mandatyn tapsyratynyn aıtty.