Elnur Beısenbaev: 2028 jyly memlekettik qaryz 57,5 trln teńgege jetedi

ASTANA. KAZINFORM — Májilis depýtaty Elnur Beısenbaev 2026-28 jyldarǵa arnalǵan respýblıkalyq bıýdjet jobasyn talqylaý kezinde memlekettik boryshtyń shekti mólsherden asyp ketkenine alańdaýshylyq bildirdi.

— Qazirgi tańda memlekettik borysh kólemi shekti mejeden asyp ketti. 2028 jylǵa qaraı jalpy qaryz 57,5 trıllıon teńgege jetip, oǵan qyzmet kórsetý shyǵyndary 4,5 trıllıon teńge bolady. Bul — bıýdjet shyǵystarynyń 15 paıyzy. Mundaı táýeldilik — ekonomıkalyq qaterdiń naqty kórinisi, — dedi depýtat.

Májilis ókili kvazımemlekettik sektordyń shamadan tys qaryzyna alańdaıtynyn aıtty.

— 2026 jylǵa qaraı kvazımemlekettik sektordyń boryshy 70 mıllıard dollarǵa jetedi. Bul — jalpy ishki ónimniń 20,5 paıyzy. ıAǵnı el ekonomıkasynyń aıtarlyqtaı bóligi osy sektorǵa táýeldi. Osylaısha, memleket ózin-ózi boryshqa tirep otyr. Eger osy saıasatty ózgertpesek, erteń biz qaryzdy emes, qaryz bizdi basqaratyn jaǵdaıǵa jetýimiz múmkin. Bul — tek Úkimetti ǵana emes, Parlamentti de alańdatatyn másele, — dedi Elnur Beısenbaev.

Buǵan deıin Májilis depýtaty Ulasbek Sádibekov te Úkimet tanystyrǵan 2026-28 jyldarǵa arnalǵan respýblıkalyq bıýdjet jobasynyń kemshilikterin ataǵan bolatyn.